Ikipe ya Real Madrid yaraye itangaje ko umunya Argentina Santiago Solari ariwe ugiye kuyibera umutoza mukuru mu gihe kingana n’imyaka ibiri n’igice aho asimbuye Julen Lopetegui uherutse kwirukanwa.

Sponsored Ad

Solari wari umaze iminsi ari umutoza w’agateganyo,yagizwe umutoza mukuru nyuma y’aho mu gihe gito yari amaze atoza Real Madrid,yayizuye ndetse ikaba yari imaze imikino 4 yikurikiranya itsinda ndetse ku bitego byinshi.

Benshi mu bakinnyi ba Real Madrid barimo Ramos,Casemiro,Thibaut Courtois n’abandi,bifuje ko uyu mugabo w’imyaka 42 yababera umutoza mukuru none birangiye ibyifuzo byabo bishyizwe mu ngiro.

Solari watozaga Real Madrid B,yaraye yemejwe n’inteko rusange ya Real Madrid nk’umutoza wayo mukuru,ndetse bemera kumuha amasezerano y’imyaka 2 n’igice.

Mu mikino 4 Santiago Solari amaze gutoza Real Madrid nkuru,yayitsinze yose ndetse yinjiza ibitego 15 yinjizwa 2 byatumye agirirwa icyizere n’abayobozi be.

Solari yakinnye mu ikipe ya Real Madrid yatwaye igikombe cya UEFA Champions League muri 2002 ari kumwe na Zidane,Figo,Makelele n’abandi ayivamo yerekeza muri Inter Milan.