Umutoza Thierry Henry wamamaye cyane mu ikipe ya Arsenal na FC Barcelona nk’umukinnyi,yatangaje ko nyuma yo kwirukanwa ku kazi ko gutoza AS Monaco yari amazemo amezi 3 n’igice,amaze amezi 4 nta muntu uramushaka ngo amuhe akazi.

Sponsored Ad

Henry utarahiriwe n’ubutoza nyuma yo guhagarika umupira w’amaguru,yabwiye ikinyamakuru The Telegraph ko kwitwara nabi mu ikipe ya AS Monaco byamugizeho ingaruka mbi cyane kuko ngo amaze amezi 4 ategereje akandi kazi ariko ngo yarahebye.

Yagize ati “Telefoni yanjye imaze amezi 4 idasona nyuma yo kuva mu ikipe ya AS Monaco gusa nakiriye telefoni 5 ntari nkeneye.Zimwe zari izo ntari niteze,izindi ni izabashakaga kungira umutoza wungirije.

Nk’umutoza uba ugomba gutekegereza akandi kazi,ibintu bigorana cyane.Birababaza cyane kuko ntabwo uba ufite nibura umukino ukurikiraho ngo nibura wigaragaze.Mu buzima iyo utsinzwe urahagururka ugahangana ariko mu butoza iyo utsinzwe urahaguruka ugategereza igihe uzongera kurwanira.”

Henry wanze akazi ka Aston Villa mbere yo kwerekeza muri AS Monaco,yavuze ko aticuza kuba yarayerekejemo kuko ngo nibura ayishimira ko ariyo yamuhaye amahirwe bwa mbere nk’umukinnyi ndetse n’umutoza.

Thierry Henry watsinze imikino 4 gusa mu mezi 3 n’igice yamaze muri AS Monaco, yavuze ko ahangayikishijwe n’aho azongera kubona akazi kuko ngo ababazwa nuko amaze igihe ntawe urongera kumuhamagara ngo amukure mu bushomeri.