Visi Perezida wa Rayon Sports,Muhirwa Freddy yatangaje ko bamwe mu bakinnyi ba Rayon Sports bakomeje kugaragaza imyitwarire idahwitse irimo kubeshya ko bavunitse bikabafasha gusiba imikino imwe n’imwe irimo iyo ku bibuga bibi.

Sponsored Ad

Muhirwa Freddy yabwiye Radio Flash FM mu gitondo cyo kuri uyu Gatatu taliki ya 09 Mutarama 2019,ko bamwe mu bakinnyi basigaye bahimba imvune bagasiba imikino, byanaviriyemo Nova Bayama kwirukanwa muri iyi kipe.

Yagize ati “Turifuza gutwara igikombe muri uyu mwaka.Mu gihe bigaragara ko kimwe gishobora kuduca mu myanya y’intoki,bamwe mu bakinnyi ntibashaka ko dushyira hamwe ngo tugaruke ku murongo.Nkubu hari abakinnyi 6 bavuze ko barwaye ariko bumvise ko turi guhana bahise baza mu myitozo yok u munsi w’ejo.Baje nta kibazo na kimwe bafite,sinzi niba bakize mu buryo bw’igitangaza.Ku munsi w’ejo mwarabibonye ko abakinnyi bose bari bahari.”

Muhirwe Freddy yasabye abakinnyi kureka amanyanga yo kubeshya ko barwaye bagasiba imikino kuko bishobora kubaviramo ibibazo bikomeye birimo ibihano.
Rayon Sports yagiye I Musanze ibura abakinnyi 9 barimo abavuze ko bafite imvune mu mavi n’ahandi,byatumye itangira guhana aho yahereye kuri Djabel na Nova Bayama wasezerewe muri iyi kipe.