Jose Mourihno aherutse gutangaza ko ikipe ya Chelsea yoroherezwa n’ishyirahamwe ry’umupira w’amaguru mu Bwongereza(FA) bitewe n’uko imikino yabo iba ipanze.

Aho avuga ko iyi kipe ya Chelsea iheruka gukina umukino wayo kuwa gatandatu ushize na Stoke City, ikaba iri bwongere gukina uyu munsi kuwa gatatu na Tottenham Hospurs, ngo ikaba yarahawe ikiruhuko gihagije.

Mu gihe Manchester united yo yakinye rimwe na Chelsea kuwa gatandatu ikina na Middlesbrough, yongeye gukina kuwa mbere na West Ham United kuwa mbere, ibintu avuga ko ari ugutonesha ikipe ya Chelsea.

Aganira na Sky Sports, Antonio Conte yatangaje ko Mourihno atababajwe n’ikiruhuko Chelsea yabonye, ahubwo ko ari ishyari ry’uko iyi kipe ya Chelsea imaze imikino igera kuri 14 idatsindwa.

Yagize ati "namubwira ko atari njye upanga uko imikino izakinwa, buriya ni ishyari ry’uko tumeze neza tumaze imikino igera kuri 14 tudatsindwa, ibi ndabimenyereye ni ibisanzwe, kuko no mu Butaliyani byabagayo, n’uko baba babona buri gihe uri hejuru."

Antonio Conte na Chelsea kugeza ubu mu mikino ya shampiyona 19 bamaze gukina; nibo bayoboye urutonde rwa shampiyona n’amanota 49, mu gihe Manchester United iri ku mwanya wa gatandatu n’amanota 39 mu mikino 20.