Ikipe ya Yanga Africans yamaze gutangaza ko itazitabira imikino ya CECAFA Kagame Cup iteganyijwe kubera mu Rwanda kuva tariki ya 7 kugeza ku ya 21 Nyakanga 2019 kubera impamvu zitandukanye yavuze mu ibaruwa yashyize hanze aho yiyongereye kuri Gor Mahia nayo bivugwa ko ishobora kutazitabira iri rushanwa kubera ko abakinnyi bayo bigiriye mu biruhuko.

Sponsored Ad

Ikipe ya Yanga Africans yemeje ko itazitabira CECAFA Kagame Cup 2019 kubera ko abakinnyi bayo benshi basoje amasezerano, abo yaguze bamwe bazaba bakiri mu makipe yabo mu gihe cya CECAFA hari abakinnyi bayo bafite amasezerano bari mu biruhuko ndetse n’abandi bazaba bari mu mikino ya AFCON izabera mu Misiri.

Andi makuru aravuga ko ikipe ya Gor Mahia itari kwitegura irushanwa rya CECAFA,kubera ko abakinnyi bayo bagiye mu biruhuko, bakazagaruka tariki ya 25/6/2019.

Aya makipe yiyongereye kuri Simba SC ikinamo Kagere Meddie na Haruna Niyonzima yavuze ko itazitabira iri rushanwa kubera ko izaba iri kwitegura umwaka utaha w’imikino I Burayi ndetse bamwe mu bakinnyi bayo b’ingenzi bazaba bari mu gikombe cya Afurika mu Misiri.

Indi kipe yatangaje ko itazirabira CECAFA Kagame Cup ni Aigle Noir yo mu Burundi, yo yatangaje ko yari yamaze gupanga kwitegurira umwaka utaha w’imikino muri Uganda na Tanzania bityo ikaba itazabasha kwitabira iri rushanwa.

Yanga Africans yanditse ibaruwa yikura mu irushanwa rya CECAFA