Muhayimana Clementine azwi nka ‘Tina’ niwe mukobwa wumvikana aririmba mu ndirimbo ‘Irarimbutse’ isigaye ikoreshwa n’abafana b’umupira w’amaguru baserereza amakipe adahagaze neza, ngo ababikora bakiyongereramo andi magambo yabo bajye babanza bumve ubutumwa bwo mu ndirimbo ye nicyo abasaba.

Sponsored Ad

Clementine yamenyekanye mu ndirimbo yitwa ‘Irarimbutse’ yakozwe muri 2014 akiga mu mashuri yisumbuye. Ubu ni umubyeyi wubatse w’abana babiri.

Uyu mugore yavuze ko indirimbo Irarimbutse bayikoze yiga mu mwaka wa kane mu kigo cya Apace yanditswe na Baganizi Olivier.

Kuba ariwe bahisemo muri Chorale yabo ngo aririmbemo ni uko ari umwe mu bari bafite ijwi riremereye bitewe n’injyana bifuzaga kuyikoramo.

Ati “ Twashakaga gukora indirimbo ikoze mu buryo bw’ikizuru kandi byasabaga umuntu ufite ijwi rikomeye nibwo barebye muri twe bakabona ko arinjye waharirimba bikagenda neza.”

Iyo ndirimbo ikimara gusohoka ngo batunguwe n’uburyo yakunzwe haba mu Rwanda no hanze yarwo.

Avuga ko iyi ndirimbo yabavunnye cyane kuko bayitakajeho amafaranga arenga ibihumbi Magana inani (800 000frw).

Yashimishijwe cyane n’ukuntu indirimbo yakiriwe hanze kugeza aho n’abafana bamakipe yo mu Rwanda basigaye bayiririmba kuma Stade bavuga ku ikipe yatsinzwe.

Ati “ Kuba iririmbwa ku mikino inyuranye ni byiza cyane ariko icyo nabwira ababikora bakayivuga bavuga ko ari ikipe irimbutse bajye babanza bumve ubutumwa bw’iyo naririmbye ubutumwa bwayo bubinjire mu mitima kugirango bihane.”

Nubwo uyu mugore yamenyekanye muri iyo ndirimbo n’uyu munsi aracyakora umuziki muri Chorale y’Abadivantiste ya Adonai ikorera mu kigo cy’amashuri yisumbuye cya Apace.

Ntabwo ateganya gukora umuziki ku giti cye ngo azakomeza guhuriza hamwe imbaraga na bagenzi be babana muri Chorale.

Mu muziki ngo nta zindi nyungu ashakamo uretse gutanga ubutumwa bwiza akameya n’umumaro byatanze mu bantu harimo abihannye bakanabatizwa, iyo ibyo bibaye ngo biramushimisha cyane kuko ari umukozi w’Imana.