Ku mugoroba w’ejo kuwa kabiri tariki 25, Kapiteni w’ikipe ya Fc Barcelone Lionel Messi yahungabanyije isi y’umupira w’amaguru aho hasohotse amakuru yemeza ko uyu mugabo w’imyaka 33 y’amavuko yamaze gusezera ku buyobozi bw’ikipe ya Barca.

Sponsored Ad

Aya makuru benshi babanje gukeka ko ari bya bihuha dusanzwe tumenyereye,gusa nyuma y’uko abakinnyi bakomeye baciye muri Barca batangiye kwandika ku mbuga nkoranyambaga bamusezera,benshi mu bafana ba Barca bahise babona ko ari ukuri maze bibananira kubyakira,niko gufata icyemezo cyo kujya mu mihanda kwigaragambya basaba ko umuyobozi wa Barca yirukanwa vuba na bwangu.

Amakuru dukesha ibinyamakuru bitandukanye by’i Barcelone akaba avuga ko Messi yasezeye ku buyobozi bwa Barca nyuma y’ikiganiro yagiranye n’umutoza mushya w’iyi kipe akamubwira ko ubu atakiri umukinnyi wihariye kuri Barca ko agomba kwitanga nkabandi bose.

Ikipe ya FC Barcelona yemereye The Associated Press ko uyu mukinnyi yamaze kubandikira urwandiko abamenyesha ko ashaka kwigendera.

Iri tangazo rije nyuma y’iminsi 11 gusa FC Barcelona inyagiwe na Bayern Munich ibitego 8-2 mu mukino wa ¼ cya UEFA Champions League.

Lionel Messi yabwiye FC Barcelona ko hagomba gukurikizwa ingingo yari mu masezerano ye aheruka imwemerera kugendera Ubuntu gusa ubuyobozi bwamusubije ko bidashoboka kuko amasezerano mashya avuga ko umukeneye agomba kwishyura miliyoni 700 z’amayero.

Abahagarariye Messi bavuze ko iyi ngingo ishobora gukurikizwa kubera ingaruka z’icyorezo cya COVID-19.

Gutsindwa kwa FC Barcelona kwababaje bikomeye Messi kuko uretse kunyagirwa bene aka kageni iyi kipe yarangije umwaka nta gikombe,ibintu yaherukaga mu mwaka wa 2007-08.

Messi yafashije FC Barcelona kwegukana LA LIGA 10 na Champions League 4 gusa uyu mwaka wamubereye mubi cyane kuko atigeze agaragara cyane kubera gusubira hasi kw’ikipe.

Isoko ryo kugura no kugurisha abakinnyi ryatangiye kuwa 27 Nyakanga 2020 rizasozwa tariki ya 05 Ukwakira uyu mwaka.

Messi arifuza kuva muri FC Barcelona kubera ko nta gahunda ihamye yo kubaka ikipe ikomeye yahatanira ibikombe byose nkuko byari bimeze mu myaka mike ishize.

Mu myaka 3 ishize,FC Barcelona yasezerewe mu buryo bubabaje n’amakipe arimo AS Roma,Liverpool na Bayern Munich bituma Messi asaba impinduka zitigeze zikorwa.

Mu kwezi kwa Kamena,Messi yatangaje ko ikipe ya FC Barcelona iri ku rwego rwo hasi ndetse nta gikozwe izasezererwa na Napoli muri 1/16 cya Champions League gusa habaye gupfundikanya irakomeza,yerekeza mu irimbukiro muri ¼ cy’irangiza.

Amakuru avuga ko Messi amaze umwaka ahangana na perezida Josep Bartomeu wa FC Barcelona bapfa icyerekezo cy’ikipe.

Amakuru avuga ko Pep Guardiola yasabye ubuyobozi bwe kuzakora ibishoboka byose bagasinyisha Lionel Messi igihe azaba yemeye kuva muri FC Barcelona.

Iyi kipe izahangana na Inter Milan ku isinya ry’uyu kizigenza cyane ko uwahoze ari umuyobozi muri iyi kipe witwa Massimiliano Mirabelli yavuze ko gusinyisha Messi ari inzozi z’iyi kipe.