Radio ikomeye yo mu mujyi wa Catalonia yitwa RAC1 yemeje ko abakinnyi 5 b’ikipe ya FC Barcelona basanganwe Coronavirus ariko ngo iyi kipe y’ubukombe ihitamo guhisha aya makuru.

Sponsored Ad

Mu gihe amakipe yo mu mashampiyona akomeye I Burayi akomeje kwitegura gusubukura shampiyona,abakinnyi ba FC Barcelona basuzumwe Covid-19 hanyuma 5 muri bo basanganwa iki Cyorezo gikomeje gutigisa isi yose.

Radio ya RAC1 yavuze ko FC Barcelona yahishe bikomeye aya makuru y’abakinnyi bayo nubwo ubu bakize bakaba baragarutse mu myitozo.

FC Barcelona yahishe aya makuru ndetse kugeza kuri ubu ntishaka kugira icyo iyavugaho cyane ko irajwe ishinga no gusubukura shampiyona igahanganira byeruye igikombe cya shampiyona na Real Madrid.

Iyi radio ntiyigeze igira umukinnyi n’umwe itangaza mu basanganwe Coronavirus muri FC Barcelona gusa hari amakuru avuga ko aba bose nta n’umwe wagaragazaga ibimenyetso.

FC Barcelona izagaruka mu kibuga kuwa 13 Kamena ikina na Mallorca muri La Liga yasubitswe ariyo iyoboye.

Iyi Radio yavuze kandi ko uretse aba bakinnyi 5 hari n’abandi bantu 2 bari mu batoza ba FC Barcelona nabo basanganwe Coronavirus.

Igihugu cya Espagne kiri mu byashegeshwe cyane na Coronavirus kuko abantu 240,000 banduye iyi ndwara hanyuma 27,000 irabahitana.

Ku munsi w’ejo hasohotse inkuru nziza muri iki gihugu ivuga ko bwa mbere kuva iki cyorezo cyatangira kumara abantu muri iki gihugu nta muntu n’umwe yahitanye.

Mu minsi ishize,Lionel Messi yatangaje ko nubwo imikino igiye gusubukurwa ariko itazongera kuryoha nkuko byari bisanzwe kubera iki cyorezo cyashegeshe isi.

Yagize ati “Hafi ya twese turibaza uko isi izaba imeze nyuma y’ibyabaye.Mu bihe bya guma mu rugo bamwe bahuye n’ibihe bigoye cyane kuko buri wese byamugizeho ingaruka mu buryo butandukanye.Hari bamwe babuze imiryango yabo n’inshuti zabo zagiye zitabasezeye.

Ndatekereza ko habaye ibyago byinshi cyane muri ibi bihe by’iki cyorezo ariko nta kiruta kubura abantu wakundaga cyane,byanteye intimba kandi niko byagendekeye buri wese.Sintekereza ko umupira w’amaguru muri rusange uzongera kuba mwiza nka kera.”