Abakinnyi b’ikipe ya kabiri ya Zenit Saint-Petersburg yo mu Burusiya bari gusingizwa cyane kubera ubutwari budasanzwe bagize ubwo binjiraga mu nzu yarimo gushya bagakuramo umugabo wari wataye ubwenge umuriro ugiye kumutwika.

Sponsored Ad

Abakinnyi ba Zenit Saint Petersburg barimo myugariro w’iburyo, Islam Zhilov w’imyaka 23, umukinnyi uca ku mpande Nikita Simdyankin w’imyaka 20, n’umutoza Luis Anula w’imyaka 28 nibo binjiye muri iyi nzu iri gushya batabara uyu mugabo.

Ibi byabaye ubwo iyi kipe ikina mu cyiciro cya 3 mu Burusiya bari mu myitozo mu gihugu cya Turkia.

Aba bantu 3 bumvise induru mu nzu yarimo gushya,ntibakangwa n’ibirimo by’umuriro barinjira basanga hari umugabo wataye ubwenge niko kumusohora.
Umutoza Anula yakoresheje kizimyamwoto,aba bakinnyi Zhilov na Simdyankin barinjira baterura uyu mugabo bamusohora hanze.

Aba bahise bahamagara imbangukiragutabara ndetse nta n’umwe muri bo wakomeretse cyangwa ngo agire ikindi kibazo nkuko iyi kipe yabitangaje kuri Twitter.

Iyi kipe yagize ati “Abakinnyi babiri bakiri bato n’umutoza bashyize ubuzima bwabo mu kaga ngo batabare umuntu wari wataye ubwenge uyu munsi.

Buri wese mu ikipe yashimiye Islam Zhilov, Nikita Simdyankin na Luis Anula kubera iki gikorwa cy’intangarugero.”