Ikipe ya Ajax Amsterdam yubatse izina I Burayi kubera ibikombe yatwaye mu myaka ya za 90,yanyagiye ikipe ya VVV-Venlo ibitego 13-0 mu mikino ya shampiyona y’icyiciro cya mbere “Eredivisie”.

Sponsored Ad

Iyi kipe ya VVV-Venlo yari yakiriye umukino,yihanganye mu minota 13 y’umukino ariko nyuma yaho akaga kaje kuyigwira ibitego byisuka mu izamu ryayo nk’imvura.
Rutahizamu wa Ajax witwa Jurgen Ekkelenkamp niwe wafunguye amazamu ndetse igice cya mbere cyarangiye ari ibitego 4-0.

Iyi kipe yahuye n’uruva gusenya ku munota wa 52 ubwo umukinnyi wayo Christian Kum yahabwaga umutuku hanyuma Ajax iyikamira mu kitoze.

Mu gice cya kabiri,Ajax yinjije ibitego 9 birimo 5 bya rutahizamu witwa Lassina Traore wari umeze neza cyane.

Ajax yatwaye shampiyona y’umwaka ushize ariko iyi niyo ntsinzi ibyibushye igize kuva yashingwa.Yakuyeho agahigo yakoze mu mwaka wa 1972 ubwo yanyagiraga Vitesse ibitego 12-1.

Ajax yateye mu izamu inshuro 23 muri uyu mukino ariko rutahizamu wayo Lassina Traore yakoze akazi gakomeye kuko uretse gutsinda ibitego 5 yanatanze imipira 3 yavuyemo ibitego.

Abakinnyi bazwi nka Dusan Tadic na Daley Blind batsinze ibitego mu gihe muzehe Klaas-Jan Huntelaar yatsinze ibitego 2.

Ajax yihimuye kuri aka gakipe nyuma y’aho mu ntangiriro z’iki cyumweru itsinzwe na Liverpool igitego 1-0 muri UEFA Champions League.