Kuri uyu wa mbere ni bwo FC Barcelona yatangiye imyitozo ku mugaragaro, yitabirwa na bamwe mu bakinnyi basanzwe bakinira iyi kipe cyo kimwe n’abashya iheruka kugura barimo Umufaransa Antoine Griezmann.

Sponsored Ad

Griezmann wari kumwe n’abandi bakinnyi bashya Barcelona iheruka kugura barimo umuzamu Neto wavuye muri Valencia na Frenkie De Jong, bakiranwe ubwuzu na bagenzi babo basanze mu kipe mbere yo gukora imyitozo yoroheje.

Antoine Griezmann we by’umwihariko yakiriwe n’abakinnyi bagenzi be bakinana mu kipe y’igihugu y’Ubufaransa, barimo Clement Lenglet, Samuel Umtiti na Ousmane Dembele.

Imyitozo ya FC Barcelona ntiyagaragayemo bamwe mu bakinnyi bakomeye basanzwe bakinira iyi kipe, barimo Luis Suarez, Arhur Melo, Philippe Coutinho, Artulo Vidal na Lionel Messi bakiri mu biruhuko nyuma yo gusoza imikino ya Copa America.