APR FC yakomeje kwigwizaho intsinzi mu gihe Rayon Sports yabonye 3 yiyushye akuya
Yanditswe: Tuesday 10, Mar 2020
Ikipe ya Rayon Sports na APR FC zabonye amanota 3 y’umunsi wa 23 wa shampiyona ziyushye akuya bituma zikomeza guhangana mu rugamba rwo gushaka igikombe cya shampiyona.
Mu mukino wari witezwe na benshi mu bakunzi ba ruhago,ikipe ya APR FC yari yakiriye Kiyovu Sports birangira iyitsinze igitego 1-0.
Nubwo iyi kipe yambara icyatsi n’umweru yari ishyigikiwe na benshi barimo n’abafana ba Rayon Sports,yatsinzwe igitego na APR FC ku munota wa 17 ibifashijwemo na Nshuto Innocent ku mupira yahawe na Imanishimwe Emmanuel uzwi nka Mangwende.
Kiyovu Sports yananiwe kwishyura iki gitego,birangira itsinzwe uyu mukino nubwo yaruhije bigaragara APR FC mu gice cya kabiri.
Umukino urangiye,Bukuru Christophe ukinira APR FC yarwanye n’umutoza wungirije wa Kiyovu Mutarambirwa Djabil,bose berekwa ikarita itukura.
Ku rundi ruhande,Rayon Sports yabonye amanota 3 yiyushye akuya ku munota wa 89, ku gitego cyatsinzwe na Niyonzima Ally winjiye mu kibuga asimbuye Nizeyimana Mirafa ku munota wa 74.
APR FC yujuje imikino 23 idatsindwa muri shampiyona, ikomeje kuyobora Shampiyona n’amanota 57, ikaba irusha amanota arindwi Rayon Sports ya kabiri na 50.
Uko imikino yo kuri uyu wa kabiri yagenze:
APR FC 1-0 Kiyovu Sports
Espoir FC 1-1 Heroes FC
Marines FC 0-1 Rayon Sports,
Musanze 2-0 Gicumbi FC
Sunrise FC 1-1 Gasogi United
Ibitekerezo
Woe wanditse c ko utatweretse imvura y’ibitego APR yatsinze byatumye itarinda kwiyuha akuya nk’aka Rayon.muge mukora kinyamwuga man hoshi.subiramo umutwe winkuru naho biragaragaza uburyo wanditse inkuru nk’umufana bitari I y’umunyamakuru
Ariko ye!!! hari success mwabonye igerwaho hatabaye kubira icyuya koko!? Gikundiro yabikoreye kandi felicitation kuri Ally NIYONZIMA na Team yose.