Ikipe ya AS Kigali iri ku rwego rwo hejuru cyane mu gice cya kabiri cya shampiyona yihanije Police FC iyitsinda ibitego 2-0 iyibuza kwiruka inyuma ya APR FC na Rayon Sports ziyiri imbere mu rugamba rwo gushaka igikombe cya shampiyona.

Sponsored Ad

AS Kigali itaratsindwa n’ikipe nkuru muri iki gice cya kabiri cya shampiyona y’u Rwanda igeze ku munsi wa 22,yatsinze ibitego 2-0 Police Fc ibifashijwemo na Nsabimana Eric uzwi nka Zidane na Kayitaba Bosco.

As Kigali yafunguye amazamu ku munota wa 37 w’umukino ibifashijwemo na Nsabimana Eric Zidane wacitse ba myugariro ba Police FC,asigaranye n’umuzamu Gahungu amutera ishoti rikomeye n’ukuguru kw’imoso.

As Kigali yashimangiye intsinzi ku munota wa 04 mu minota 05 y’inyongera 05 bashyize kuri 90,ubwo Kayitaba Jean Bosco wagiyemo asimbuye Alexis Ortamal yatsindaga igitego cya kabiri ku mupira yahawe na Ndekwe Felix awuroba umuzamu Gahungu,uruhukira mu nshundura.

Uku gutsinda kwa AS Kigali kwatumye iguma ku mwanya wa 06 n’amanota 32 mu gihe Police FC yo yagumye ku mwanya wa 03 n’amanota 43.