Ikipe ya AS Kigali ihagarariye u Rwanda mu mikino ya CAF Confederations Cup yatsindiwe muri Botswana na Orapa United ibitego 2-1,wabaye kuri iki cyumweru kuri stade nkuru yo mu mujyi wa Gaborone.

Sponsored Ad

AS Kigali yahagurutse mu Rwanda kuwa Kabiri tariki 24 Ugushyingo 2020, yerekeza muri Botswana,gukina uyu mukino ubanza n’ikipe ya Orapa United mu mikino y’Afurika y’amakipe yitwaye neza iwayo “Total CAF Confederation Cup 2020-2021”,ntiyahiriwe n’urugendo kuko yatsinzwe ibitego 2-1.

Orapa United yatangiye umukino iri hejuru kuko yabonye igitego cya mbere ku munota wa 12 ibifashijwemo n’umukinnyi wayo Gofaone Mabaya hanyuma bidatinze ibona igitego cya 2 ku munota wa 19 ibifashijwemo na Mbatshi Elias.Igice cya mbere cyarangiye Orapa iyoboye n’ibitego 2-0.

Mu gice cya kabiri,AS Kigali yirwanyeho ibona igitego kimwe ibifashijwemo na rutahizamu mushya Abubakar Lawal ku munota wa 57.

AS Kigali yatsinzwe uyu mukino ubanza,irasabwa kuzatsinda igitego 1-0 cyangwa se ikinyuranyo cy’ibitego 2 igihe yaba yinjijwe igitego I Kigali.

Ikipe ya AS Kigali yitabiriye aya marushanwa nyafurika ku nshuro ya 3 (2014, 2019-2020 na 2020-2021). Muri 2014, AS Kigali yaviriyemo mu kiciro cya 3 naho muri 2019-2020 iviramo mu kiciro cya 3.

Orapa United yashinzwe muri 2010 nayo yitabiriye imikino y’Afurika ku nshuro ya 3 (2017 na 2019 na 2020-2021).Inshuro zose iyi kipe yaviriyemo ku ijonjora ribanza.

AS Kigali ifite intego yo gukina amatsinda uyu mwaka, irasabwa gusezerera Orapa United muri iyi mikino ibiri ndetse no kuba yazakuramo KCCA yo muri Uganda izahura n’ikipe izagera mu ijonjora rya kabiri mbere y’uko hakinwa ijonjora rya nyuma.

Ni ku nshuro ya kabiri yikurikiranya ikipe ya AS Kigali igiye guhagararira u Rwanda muri CAF Confederation Cup, ni nyuma y’uko Igikombe cy’Amahoro cya 2020 kitabaye kubera COVID-19, hemezwa ko iyi kipe yagitwaye mu 2019 yongera gusohoka.

Abakinnyi AS Kigali yakoresheje ikina na Orapa United mu mukino ubanza