Ikinyamakuru Forbes cyatangaje ko kabuhariwe Cristiano Ronaldo ukinira ikipe ya Juventus yaciye agahigo ko kuba umukinnyi wa mbere ku isi mu mupira w’amaguru utunze akayabo ka miliyari y’amadolari aturutse mu mishahara ye,ubucuruzi no kwamamaza.

Sponsored Ad

Cristiano Ronaldo w’imyaka 35 yatanze mugenzi we bahora bahanganye Lionel Messi kuzuza miliyari y’amadolari bituma aba umukinnyi wa 3 mu mikino yose iri ku isi utunze aka kayabo ndetse aba umukinnyi wa mbere w’umupira w’amaguru ubigezeho.

Ronaldo ageze ikirenge mu cya Floyd Mayweather wahoze akina iteramakofe na Tiger Woods ukina Golf nabo batunze miliyari.

Forbes izwiho gukora intonde ngarukamwaka z’ukuri ku bijyanye n’amafaranga ibyamamare byinjiza, yavuze ko mu mwaka ushize wa 2019,Cristiano Ronaldo yinjije akayabo ka miliyoni 89 z’amapawundi zirimo 35 z’amapawundi yakuye mu mishahara andi yose yavuye mu bucuruzi bwe,mu kwamamaza n’uduhimbazamusyi.

Muri uyu mwaka kandi Forbes yavuze ko Cristiano Ronaldo yaje ku mwanya wa kabiri mu bakinnyi binjije menshi aho yakusanyije akayabo ka miliyoni 105 z’amadolari.Aya yabazwe guhera tariki ya 01 Kamena 2019-01 Kamena 2020.

Roger Federer niwe wabaye umukinnyi wa mbere winjije menshi muri uyu mwaka wa 2020 imbere ya Cristiano Ronaldo na Messi, ndetse aba umukinnyi wa mbere wa Tennis mu myaka 30 ishize, ushoboye kuba umukinnyi wa mbere ku isi mu binjije akayabo kurusha abandi bakinnyi bose.

Ronaldo yinjiza asaga miliyoni 35 z’amapawundi buri mwaka mu gukorana na Nike basinyanye amasezerano y’ubuzima bwe bwose,ziyongeraho izo akura mu gucuruza imyenda ye y’imbere,amahoteli ye menshi amwinjiriza n’andi matangazo yo kwamamaza akora mu bigo bitandukanye hirya no hino.

Igitangaje kurusha ibindi nuko uyu munya Portugal agiye kuzuza miliyari y’amadolari kandi ari umu kinnyi wa 3 uhembwa amafaranga menshi nyuma ya Lionel Messi na Neymar gusa abarusha kwinjiza akayabo hanze y’ikibuga.

Kuva yatangira umupira w’amaguru,Cristiano Ronaldo amaze guhembwa imishahara ingana na miliyoni zikabakaba 600 z’amadolari.

Cristiano Ronaldo afite kompanyi ye yitwa CR7 imwinjiriza akayabo bikiyongeraho ko ariwe muntu ukurikirwa na benshi kuri Facebook na Instagram.

Buri post ashyize kuri Instagram imwinjiriza miliyoni y’amapawundi agahigo yihariye wenyine ku isi.Buri mwaka yinjiza asaga miliyoni 14 z’amapawundi ku bintu yashyize ku mbuga nkoranyambaga.

Cristiano Ronaldo atunze indege yo mu bwoko bwa G650 Gulfstream yaguze akayabo ka miliyoni 30 y’amapawundi,ikodeshwa ikamwinjiriza akayabo iyo atari gukora ingendo.

Messi bahora bahanganye muri ruhago,nawe azaba umukinnyi wa kane mu mikino yose utunze miliyari y’amadolari mu mwaka utaha nkuko Forbes yabitangaje.

Ronaldo aherutse kugabanya umushahara we muri Juventus kugira ngo ayifashe kwiyubaka kubera ibihe bibi bya Coronavirus byahungabanyije ubukungu ku isi.

Mu ntangiriro z’uyu mwaka,Cristiano Ronaldo yabaye umuntu wa mbere wujuje miliyoni 200 z’abamukurikira kuri Instagram,yigaranzuye Ariana Grande,Dwayne Johnson na Selena Gomez bamukurikiye.