Rutahizamu ukomoka mu gihugu cya Portugal, ukinira ikipe ya Juventus de Turin yo mu Butaliyani,usanzwe afite agahigo ko kuba umuntu wa mbere ukurikirwa n’abantu benshi ku rubuga nkoranyambaga rwa Instagram na miliyoni 250,kuri ubu ararusha abafana bo kuri uru rubuga amakipe yose yo muri Premier League uyateranyije.

Sponsored Ad

Muri Mutarama 2020,nibwo Cristiano Ronaldo yujuje Miliyoni Magana abiri (200,000,000) z’abamukurikira kuri Instagram ariko arangije umwaka afite 250 M mu gihe amakipe yose yo muri Premier League afite miliyoni 159 kuri Instagram.

Cristiano Ronaldo yakoze amateka adasanzwe mu mupira w’amaguru ahanini bitewe n’uduhigo yaciye mu ikipe ya Real Madrid yo muri Espagne yavuyemo yerekeza mu Butaliyani mu ikipe ya Juventus mu 2018.

Ubwo haherukaga gushyirwa hanze urutonde rw’abakurikirwa cyane kuri Instagram,Ronaldo wa mbere yarusha umuhanzi w’Umunyamerika akaba n’umukinnyi wa filimi, Ariana Grande, miliyoni 27 z’abantu bamukurikira kuri Instagram.

Cristiano Ronaldo yafashe umwanya w’umuntu wa mbere ukurikirwa n’abantu benshi kuri Instagram mu Ukwakira 2018 nyuma yo kuwukuraho Selena Gomez.

Cristiano Ronaldo w’imyaka 35 yamavuko, yagiye muri Juventus aguzwe miliyoni £100 avuye muri Real Madrid yari amazemo imyaka icyenda.