Umutoza Didier Gomes Da Rosa, ufite ubwenegihugu bw’Ubufaransa na Portugali, kuri iki cyumweru yerekanwe ku mugaragaro nk’umutoza mushya w’ikipe ya Simba SC yo muri Tanzania.

Sponsored Ad

Gomes Da Rosa, watoje Rayon Sports yo mu Rwanda akanayihesha igikombe cya shampiyona mu mwaka w’imikino wa 2012-2013, yashyize umukono kuri kontaro yo gutoza Simba SC aho agiye gutangirana na gahunda y’imikino y’amatsinda ya TOTAL CFA Champions League 2020-2021.

Gomes Da Rosa w’imyaka 49 y’amavuko, asimbuye Umufaransa Patrice Neveu wari usanzwe atoza iyi kipe, wayivuyemo ku wa kabiri w’iki cyumweru ku bwumvikane bw’impande zombi.

Didier Gomes ni umwe mu batoza abakunda Rayon Sport batazibagirwa kuko uretse kubahesha igikombe cya shampiyona muri 2013 baherukaga mu myaka icyenda, yanahinduye isura y’iyo kipe mu mikinire, inatwara ibikombe bitandukanye byagiye bitegurwa imbere mu gihugu.

Uretse gutoza Rayon Sports yo mu Rwanda akayihesha igikombe cya shampiyona yo mu mwaka w’imikino 2012-2013,yatoje muri Cameroun aho yahesheje Coton Sport de Garoua igikombe mu mwaka wa 2014 na 2015, ndetse atoza Horoya muri Guinea,CS Constantine,Ismaily n’izindi.

Gomes Da Rosa yanagejeje Coton Sport de Garoua muri kimwe cya kabiri mu mikino y’igikombe cya Confederation Cup.