Umutoza wa Chelsea,Frank Lampard,yavuze ko nubwo umukinnyi we Timo Werner ari mu bihe bibi ariko bibaho mu mupira w’amaguru ndetse azava mu bihe bibi arimo akongera gutsinda ibitego byinshi cyane.

Sponsored Ad

Ikipe ya Chelsea yaraye ihagaritse ibihe bibi yari irimo byo kudatsinda kuko yatsinze Fulham igitego 1-0 cya Mason Mount cyaje mu minota ya nyuma.

Chelsea yari imaze imikino 3 idatsinda,yabonye amahirwe menshi muri uyu mukino arimo n’akomeye Timo Werner yahushije ubwo yasigaranaga n’umunyezamu wa Fulham Areola bari bonyine ananirwa gutsinda igitego.

Nyuma y’umukino,Frank Lampard yabwiye abanyamakuru ati “Ndatekereza ko bibaho.Ntabwo utsinda ibitego uko ubishaka kuko yaratsinze mu cyumweru gishize muri FA Cup.

Byamubayeho kubera ko ari umukinnyi ukomeye gusa njye nashimishijwe no kuba yageze imbere y’izamu.Akunda kugera imbere y’izamu tugomba kumufasha kubona imipira agatsinda ibitego.”

Werner yinjiye mu kibuga asimbuye ariko kugeza ubu ntarabasha kwerekana ubuhanga bwe nkuko byari bimeze akiri muri Leipzig.