Ikipe yo mu Butaliyani yatsinzwe ibitego 20-0 birimo 16 yatsinzwe mu gice cya mbere,yaciye ibintu hirya no hino ku isi
Yanditswe: Monday 18, Feb 2019
Ikipe yo mu cyiciro cya 3 cyo mu Butaliyani,Serie C,yitwa Pro Piacenza yaraye itsinzwe ibitego 20-0 na Cuneo mu mukino yakinishije abakinnyi 7 gusa biganjemo abafite imyaka 16 kubera ikibazo cy’ubukene.
Pro Piacenza yagize ibibazo bikomeye by’ubukene byatumye abakinnyi bayo bose ndetse n’abatoza bigendera,bituma ijya gushaka abana bato bo kuyikinira kuko yangaga ko yakwirukanwa muri shampiyona.
Pro Piacenza yari imaze gusiba imikino ya shampiyona inshuro 2 zose,yanze guterwa indi mpaga yari gutuma ihita yirukanwa burundu muri shampiyona niko kujya gutoragura abakinnyi bakiri bato baraza bayifasha gutsindwa ibitego 20-0.
Igice cya mbere cy’uyu mukino cyarangiye ari ibitego 16-0,Cuneo irabababarira mu gice cya kabiri ibatsinda ibitego 4 gusa.
Muri uyu mukino,umukinnyi witwa Hicham Kanis yatsinzemo ibitego 6 mu gihe abandi bagenzi be babiri batsinze 3 harimo n’undi watsinze 5 wenyine.
Abakinnyi bose ba Pro Piacenza bari hagati y’imyaka 16 na 19 ndetse kapiteni wabo Nicola Cirigliano niwe wakoraga nk’umutoza.
Leave a Reply
Your email address will not be published. Required fields are marked *