Umutoza wa Tottenham,Jose Mourinho,yagaragaye ari kugemurira ibyo kurya abasaza baheze mu rugo kubera icyorezo cya COVID 19 gikomeje kuyogoza isi yose aho abarenga ibihumbi 14 bamaze gupfa.

Sponsored Ad

Mourinho w’imyaka 57 yagaragaye yipfutse mu maso ari kugemurira abantu bageze mu zabukuru babujijwe gusohoka mu nzu na Coronavirus bo mu mujyi wa London.

Abari muri uyu murimo w’urukundo bagaragaye bari kwifotozanya n’uyu mutoza w’icyamamare watwaye ibikombe bikomeye ku isi mu makipe arimo Manchester United, Real Madrid,Chelsea,Inter Milan na FC Porto.

Mu mashusho yashyize hanze,Mourinho yasabye abantu kugira umutima utabara bagafaha ababaye muri ibi bihe bibi isi yose ihanganye na Coronavirus.

Aba bantu bageze mu za bukuru bandikiye umutoza Jose Mourinho bamushimira kuba yababaye hafi akabagemurira ibyokurya.

Abantu 335 muri UK bamaze guhitanwa na COVID-19,mu gihe abagera ku 6,650 bamaze kuyandura.

Imikino itandukanye hirya no hino ku isi yamaze gusubikwa kubera iki cyorezo kibi cyane ariyo mpamvu abantu batandukanye basabwe kuguma mu rugo mu gihe abandi bari kugerageza gufasha ababaye.