Umuyobozi wa Gasogi united akaba na nyirayo,Kakoza Nkuriza Charles [KNC] yavuze ko yasaruye miliyoni 19 FRW mu bakunzi ba ruhago mu Rwanda ubwo yahagamaga Rayon Sports kuri stade Amahoro kuwa Gatandatu w’icyumweru gishize bakanganya 0-0.

Sponsored Ad

Mu kiganiro KNC yagiranye n’abanyamakuru yavuze ko mu mukino wahuje Gasogi United na Rayon Sports yasaruye mu bakunzi bayo,ab’urubambyingwe be ndetse n’ab’ayandi makipe n’abakunzi ba ruhago muri rusange akayabo ka miliyoni 19 FRW angana na 7 ku ijana k’ingengo y’imari azakoresha muri uyu mwaka w’imikino.

KNC yavuze ko bifuza kubona amanota atatu ya mbere kuri Marines FC baratana mu mitwe kuri uyu wa Gatatu tariki ya 9 Ukwakira 2019, kuri sitade ya Kigali (15h00’).

KNC yagize ati “ Turashaka kubona amanota atatu ya mbere imbumbe dukina na Marines FC. Abakunzi ba Gasogi United n’ab’ayandi makipe bazaze barebe umupira mwiza usukuye.”

KNC uherutse kuvuga ko azahagama Rayon Sports akabikora,yavuze ko uyu mwaka w’imikino ataje gutembera mu cyiciro cya mbere ahubwo aje gutanga isomo rya ruhago ku bigugu byo mu Rwanda.