Ikipe ya Manchester City yo mu gihugu cy’Ubwongereza yamaze kwakira amakuru ava mu rukiko nkemurampaka rw’imikino itandukanye ku isi (CAS), ayimenyesha ko urubanza rwayo n’ishyirahamwe ry’Umupira w’amaguru I Burayi (UEFA), ruzaba mu cyumweru cya kabiri cy’ukwezi gutaha kwa Kamena.

Sponsored Ad

UEFA yahanishije Manchester City amande y’amafaranga agera kuri miliyoni 30 z’amayero ndetse no guhagarikwa imyaka ibiri ititabira yayo kubera kwica amategeko ajyanye no kugura no kugurisha abakinnyi (Financial Fair Play).

Akanama gashinzwe kugenzura imikoreshereze y’amafaranga muri UEFA,Chamber of UEFA’s Club Financial Control Body (CFCB) katangaje ko hagati y’umwaka wa 2012 na 2016 Manchester City yagize uburiganya mu gutangaza amafaranga yinjije mu baterankunga.

Manchester City yafatiwe ibihano na UEFA byo guhagarikwa mu marushanwayayo arimo UEFA Champions League na Europa League, imyaka ibiri ndetse inacibwa amande.

Nyuma iyi kipe ibarizwa mu mugi wa Manchester mu Bwongereza yaje gutanga ubujurire mu rukiko nkemurampaka rw’imikino itandukanye ku isi (CAS), uru rukiko rukaba rwatangarije iyi kipe ko mu cyumweru cya kabiri cy’ukwezi gutaha ari bwo bazafata umwanzuro.

Kuri ubu abakunzi b’umupira w’amaguru bategerezanyije amatsiko kureba niba ibihano iyi kipe yari yafatiwe bizakurwaho, ibi byaba bivuze ko umwanzuro wa mbere wari wafashwe n’ishyirahamwe ry’umupira w’amaguru I Burayi UEFA waba uteshejwe agaciro. Hagati ya tariki 8 na tariki 10 Kamena Manchester City nibwo izamenyeshwa umwanzuro.

Ishyirahamwe ry’umupira w’amaguru I Burayi, UEFA ryatangiye iperereza kuri iyi kipe mu Ugushyingo 2018 nyuma y’amakuru yari akomeje gutangazwa n’ikinyamakuru cyo mu Budage Der Spiegel, Manchester City yatangiye guhakana aya makosa mu gihe UEFA itari yagatangiye iryo perereza.

Ferran Soriano umuyobozi mukuru w’ikipe ya Manchester City we atangaza ko amafaranga yose yinjiye muri iyi kipe yatangajwe mu buryo bunyuze mu mucyo. Urukiko nkemurampaka rw’imikino itandukanye ku isi (CAS) rwakiriye ubujurire bw’iyi kipe ku itariki 26 Gashyantare nta minsi 14 ishize bayifatiye ibihano.

Amakuru meza kuri Manchester City ni uko kuri ubu ishobora kuzitabira amarushanwa y’I Burayi umwaka w’imikino utaha, ibi birashoboka kuko umwaka w’imikino 2019/2020 uzagera mu kwezi gutaha utari warangira bitewe n’icyorezo cya COVID-19 (Coronavirus) cyatumye imikino ihagarikwa.

Bivuze ko kuri Mancheter City kuba yakwitabira amarushanwa y’umwaka utaha bishoboka igihe cyose imyanzuro itari yasohoka.

Guhagarikwa mu irushanwa rya Uefa Champions League byaba bivuze ko Manchester United iri ku mwanya wa gatanu yahita isimbura mukeba wayo Manchester City iri ku mwanya wa kabiri ku rutonde rwa shampiyona.

Umutoza wa Manchester City, Pep Guardiola yatangaje ko yifuza kuguma muri iyi kipe nubwo yafatirwa ibihano, ni mu gihe umwe mu bakinnyi bayo Kevin De Bruyne we atangaza ko guhagarikwa kw’iyi kipe byaba ari icyemezo gikakaye.

Inkuru yakozwe na Heritier Twizerimana