skol
fortebet

Manchester United yasezerewe muri UEFA Champions League Cristiano Ronaldo yihaniza FC Barcelona

Yanditswe: Wednesday 09, Dec 2020

Sponsored Ad

Ikipe ya Manchester United yasezerewe muri UEFA Champions League itarenze amatsinda nyuma yo gutsindwa na RB Leipzig ibitego 3-2 mu mukino wa nyuma w’amatsinda y’iri rushanwa yaranzwe no kuva mu kibuga kw’abakinnyi ba Paris Saint-Germain na Istanbul Basaksehir kubera ivanguraruhu.

Sponsored Ad

Manchester United yatangiye amatsinda itsindira PSG iwayo ibitego 2-0,yananiwe kurenga umutaru nyuma yo gutsindwa na RB Leipzig ibitego 3-2 mu mukino wabereye mu Budage.

Manchester United yatangiye igice cya mbere cy’umukino iri ku rwego rwo hasi,yatsinzwe igitego cya mbere ku munota wa 2 gitsinzwe na Angelino nyuma y’uburangare bw’aba myugariro bayo.

Ku munota wa 13,RB Leipzig yabonye igitego cya kabiri cyatsinzwe na Amadou Haidara nabwo ku burangare bwa ba myugariro ba Manchester United,bituma iyi kipe y’Ubukombe itakaza amahirwe yo kuba yagera muri 1/16 cya UEFA Champions League.

Igice cya mbere cyarangiye Leipzig iri imbere n’ibitego 2-0 ndetse iki gice ni nayo yacyihariye kuko hari n’ikindi gitego yatsinze VAR iracyanga.

Mu gice cya kabiri,United yinjije mu kibuga Pogba na Van de Beek ngo baze gufasha kuzibira abakinnyi ba Leipzig bari hejuru mu mukino wo gucungira kuri counter attack.

Ku munota wa 69,amahirwe ya United yo kwishyura iyi kipe yakomwe mu nkokora n’igitego cya 3 cyatsinzwe na Justin Kluivert winjiye mu kibuga asimbura.

United yagerageje gushaka igitego cya mbere iza kubigeraho ku munota wa 80 kuri penaliti yinjijwe neza na Bruno Fernandes wahanaga ikosa ryakorewe kuri Mason Greenwood mu rubuga rw’amahina.

Bidatinze ku munota wa 82,Paul Pogba yaboneye Manchester United igitego cya 2 n’umutwe ku mupira wari uturutse kuri coup franc yari itewe na Bruno Fernandes.

United yahise itangira gushaka igitego cya 3 cyane ko yasabwaga kubona inota rimwe ngo ibashe gukomeza mu cyiciro gikurikiyeho,birangira ikibuze aho igomba gukina imikino ya Europa League yaviriyemo muri ½ mu mwaka w’imikino ushize.

Ku rundi ruhande,Juventus ya Cristiano Ronaldo yatsinze FC Barcelona iyisanze ku kibuga cyayo Camp Nou ibitego 3-0 birimo 2 Cristiano Ronaldo yinjije kuri penaliti na kimwe cya Weston Mckennie.

Hari hashize imikino 38 FC Barcelona idatsindirwa ku kibuga cyayo muri UEFA Champions League.byaherukaga 2013.

Undi mukino watumye isi yose icika ururondogoro n’uwahuje Paris Saint-Germain na Istanbul Basaksehir wasubitswe kubera ko umusifuzi wo ku ruhande yatutse umutoza wungirije wa Istanbul Basakssehir ku ruhu.

Bijya gutangira,ku munota wa 14 umutoza wungirije wa Istanbul Basaksehir witwa Pierre Webo yahawe ikarita itukura kubera ko yagaragaye ari gutukana n’umusifuri wa 4 w’umunya Romania witwa Sebastian Coltescu,yanga kujya mu bafana avuga ko atutswe ko ari “negru” cyangwa se “umwirabura”.

Ibi byakuruye umwuka mubi hagati y’abasifuzi,abakinnyi n’abayobozi b’amakipe aho hahise hakurikiraho intambara y’amagambo n’impaka zamaze iminota 15 yose.

Abakinnyi ba The Istanbul Basaksehir bavuye mu kibuga hashize iminota 22 binjira mu rwambariro bituma n’aba PSG nabo bagenda umukino usubikwa utyo.

Umukino urasubukurwa kuri uyu wa 3 saa 19:55 hazanwa abandi basifuzi bashya ndetse uyu mukino uzatangirira ku munota wa 14 wasubikiweho.UEFA yemeje ko irakora iperereza ryimbitse kuri Bwana Sebastian Coltescu.

Mu yindi mikino yabaye Chelsea yanganyije na Krasnodar 1-1,Sevilla itsinda Rennes 3-1,Lazio inganya 2-2 na Club Brugge.Zenit yatsinzwe 2-1 na BVB mu gihe Dynamo Kyiv yatsinze Frencvaros 1-0.





Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa