Ikipe ya Manchester United iheruka kwandagazwa bikabije na Tottenham yayitsinze ibitego 6-1,yatangiye kurambagiza umutoza Mauricio Pochettino ngo asimbure Ole Gunnar Solskjaer udahagaze neza.

Sponsored Ad

Ibinyamakuru byavuze ko ikipe ya Manchester united yatangiye kuvugana na Mauricio Pochettino udafite akazi kugira ngo aze gusimbura Ole.

Ku cyumweru gishize nibwo Manchester United yari mu rugo yatsinzwe na Tottenham ibitego 6-1 bituma benshi mu bakunzi bayo batangira gushidikanya ku bushobozi bw’umutoza Ole Gunnar Solskjaer.

Nubwo yaguriwe abakinnyi, Ole Gunnar Solskjaer amaze gutsinda umukino umwe mu mikino 3 amaze gukina muri Premier League ariyo mpamvu bivugwa ko Mauricio Pochettino ashobora kumusimbura.

Umutoza Mauricio Pochettino amaze amezi 11 ari umushomeri nyuma yo kwirukanwa na Tottenham agasimburwa na Jose Mourinho.

Ikinyamakuru Daily Star cyatangaje ko abayobozi bakuru muri United batangiye guhamagara Mauricio Pochettino kugira ngo yitegure kuza gufata akazi igihe Ole azaba yirukanwe.

Bamwe mu bayobozi ba United basabye Solskjaer gutanga umusaruro bitaba ibyo akirukanwa mu gihe umuyobozi w’iyi kipe Ed Woodward yanze kumwirukana.

Guhamagara Pochettino n’uguteganya ko Ole ashobora kwirukanwa mu minsi iri imbere akaba yahita amusimbura.

Pochettino yatangiye gutoza Spurs muri 2014 ariko mu myaka 5 yakurikiyeho yayigejeje ku mukino wa nyuma wa UEFA Champions League.

Muri iyo myaka,Tottenham yimukiye kuri stade yayo nziza ndetse uyu munya Argentina yazamuye abakinnyi benshi bakomeye bavuye mu ishuri ry’umupira w’amaguru barimo na Harry Kane.

Ole ntabwo aragera ku mutima abakunzi ba United nubwo yabashije kurangiza ku mwanya wa 3 mu mwaka w’imikino ushize.

Mauricio Pochettino arahabwa amahirwe yo gusimbura Ole muri United