Ikipe ya Arsenal yaraye itsinze umukino wa 3 wikurikiranya muri uyu mwaka w’imikino wa 2020/2021 ubwo yatsindaga Leicester City ibitego 2-0 mu mukino wa Carabao Cup gusa benshi bibajije impamvu umutoza Arteta yongeye kwima umwanya Mesut Ozil.

Sponsored Ad

Arteta yatoranyije ikipe yiganjemo abakinnyi basimbura ariko ntiyigeze atekereza kuri Mesut Ozil umaze igihe kinini adakina kandi ariwe uhembwa amafaranga menshi kurusha abandi mu ikipe ya Arsenal.

Mesut Ozil wavuze ko azava muri Arsenal amasezerano ye arangiye mu mpeshyi itaha,ntiyigeze agaragara mu bakinnyi 18 Arsenal yari yateganyije gukoresha ku mukino wa nimugoroba aho Arteta yavuze ko uyu Mudage ukomoka muri Turkia ari ku rwego rwo hasi ugereranyije n’abakinnyi atoranya.

Mikel Arteta yabwiye abanyamakuru ati “Mubona ko abakinnyi dukoresha bari ku rwego rwo hejuru ndetse uretse na Mesut,buri mukinnyi wese agowe no kwinjira mu bakinnyi bagomba gukina.Buri cyumweru tugerageza gutoranya abakinnyi beza.

Nejejwe nuko abakinnyi bari kwitwara n’ukuntu bari kugora cyane abatoza mu guhitamo abagomba gukina.Biragoye kuri bamwe kuba bakina muri Premier League no kuba bari gukina nimugoroba.Dufite ikipe y’abakinnyi 26,27 kandi ntitwabasha kubaha bose umwanya uhagije wo gukina.Ntoranya abakinnyi bari mu bihe byiza.”

Umutoza Arteta yahishuye ko Ozil atari ku rwego rwo hejuru ku buryo yamurutisha abarimo Willock,Nketiah na Reiss Nelson baraye babanje mu kibuga bagatanga umusaruro.

Arsenal yaraye itsinze Leicester City ibifashijwemo na Christian Fuchs witsinze igitego na Eddy Nketiah watsinze igitego ku munota wa nyuma.

Iyi kipe ya Arteta ishobora guhura na Liverpool mu cyiciro gikurikiraho cya Carabao Cup gusa ni nako yitegura guhangana n’iki kigugu mu mukino ukurikira muri Premier League kuwa Mbere.