Ubuyobozi bw’ikipe ya Mukura VS bwamaze kwirukana burundu Umunya Cameroon Mathurin Olivier Ovambe wari umaze amezi 3 ari umutoza wabo mukuru.

Sponsored Ad

Kuri uyu wa gatanu taliki 18 Ukwakira 2019, nibwo ubuyobozi bw’ikipe ya Mukura VS bwashyikirije Olivier Ovambe ibaruwa imumenyesha ko atakiri umutoza wabo ndetse bamugenera ibyo yasinye mu masezerano.

Uyu mutoza yari amaze iminsi umunani ahagaritswe by’agateganyo azira imyitwarire mibi yagaragaje ku mukino wahuje Mukura VS na Sunrise Fc kuwa gatatu taliki 09 Ukwakira 2019, aho yinjiye mu kibuga atabyemerewe n’abasifuzi hanyuma akanarenga ku mabwiriza bamuhaye bimuviramo guhabwa ikarita itukura.

Siboyintore Theodate, umunyamabanga mukuru wa Mukura VS asobanura ko ubuyobozi bwakomeje gukurikirana andi makuru ajyanye n’imyitwarire ye n’umwuka mubi wari mu ikipe bufata icyemezo cyo kumusezerera.

Yagize ati :’’Twamusezereye binyuze mu ibaruwa twamuhaye, Twagerageje gushaka andi makuru , tugerageza guhura nawe , hari ibyo tutumvikanye nawe bijyanye n’imikorere n’imyitwarire, dufata umwanzuro wo kumuhagarika.’’

Biravugwa ko mu masezerano y’imyaka 2 Ovambe yari yarasinye harimo ingingo ivuga ko agomba kwishyurwa miliyoni imwe y’amafaranga y’u Rwanda igihe yirukanwe atarangiye.

Mukura igiye gukomeza gutozwa na Tony Hernandez wari umutoza wungirije kugeza igihe hazafatwa icyemezo cya nyuma.

Ovambe wahesheje Mukura VS igikombe cy’Agaciro atsinze kuri penaliti APR FC na Rayon Sports, yanganyije imikino 2 ibanza ya shampiyona na Espoir FC ndetse na Sunrise FC ntibyashimisha ubuyobozi bwe.

Mukura VS yirukanye burundu Olivier Ovambe