Rutahizamu wa Juventus, Paulo Dybala,yemeje ko we n’umukunzi we Oriana basanganywe icyorezo cya COVID-19 nyuma yo gukorerwa ibizamini.

Sponsored Ad

Uyu mukinnyi abinyujije ku mbuga nkoranyambaga ze yemeje ko ibizamini byagaragaje ko we n’umukunzi we banduye iki cyorezo gikomeje koreka imbaga ku isi yose.

Paulo Dybala abinyujije kuri Twitter ye yagize ati “Muraho mwese.Ndashaka kubamenyesha ko twakiriye ibisubizo njye na Oriana dusanga twaranduye icyorezo cya Covid-19.Amahirwe nuko tumeze neza kandi turabashimiye ku bw’ubutumwa bwanyu kandi turabasuhuje mwese.”

Dybala yiyongereye kuri bagenzi be babiri bakinana barimo Daniele Rugani na Blaise Matuidi nabo baherutse gutangaza ko banduye iki cyorezo.

Aba bombi banduriye iki cyorezo mu Butaliyani hakomeje kwiyongera imibare y’impfu zitewe n’iki cyorezo.

Imibare itangazwa n’abategetsi yerekana ko abantu 793 bapfuye mu masaha 24 ashize bazize Covid-19. Nibo benshi ku munsi kugeza ubu.

Abantu 4,825 bamaze gupfa mu Butaliyani kuva iyi ndwara yahagera.

Abantu barenga 53,000 babasanzemo Covid-19 mu Butaliyani, abarenga 6,500 ni abo bayibonyemo uhereye ejo.