Abategura shampiyona ikunzwe kurusha izindi ku isi muri ruhago “Premier League” batangaje ko izasubukurwa byibura Tariki 30 Mata uyu mwaka, ibintu nibigenda neza icyorezo cya COVID-19 kikagabanuka mu Bwongereza.

Sponsored Ad

Mu itangazo ryagiye hanze uyu munsi,FA yatangaje ko amarushanwa arimo Premier League na FA Cup atazasubukurwa kuwa 03 Mata 2020 nkuko byari byatangajwe ahubwo yongerewe igihe ashyirwa kuwa 30 Mata 2020 kubera icyorezo cya COVID-19 gikomeje koreka imbaga.

FA yatangaje ko nibura aya marushanwa yayo ashobora gusubukurwa kuri iriya Taliki ariko yongeraho ko nabwo bizaterwa nuko ibintu bizaba byifashe.

Mu gitondo cyo kuri uyu wa Kane nibwo umuyobozi wa Premier League witwa Richard Masters yagiranye ikiganiro n’amakipe atandukanye bemeranya ko iyi shampiyona yasubikwa kugeza kuwa 30 Mata 2020.

Icyakora FA yavuze ko byanze bikunze amarushanwa yose yasubitswe azarangira gusa azakererwa cyane kubera iki cyorezo.Ubuyobozi bwishimiye ko Euro 2020 yimuwe igashyirwa muri 2021.

Premier League iheruka gukinwa kuwa 09 Werurwe 2020 ubwo ikipe ya Leicester City yanyagiraga Aston Villa ibitego 4-0.

Nyuma y’aho umutoza wa Arsenal, Mikel Arteta na rutahizamu wa Chelsea witwa Callum Hudson-Odoi basanganywe coronavirus,Premier League yahise isubikwa kugeza magingo aya.