Ikipe ya PSG yasabye FC Barcelona ibya mirenge kugira ngo iyihe rutahizamu Neymar Jr birimo ko igomba kwishyura miliyoni 116 z’amapawundi ndetse ikayiha abakinnyi babiri barimo Philippe Coutinho na Ousmane Dembele.

Sponsored Ad

PSG yaguze Neymar Jr mu mwaka wa 2017 miliyoni 198 z’amapawundi,irifuza ko FC Barcelona ishaka kumwisubiza yayishyura akayabo ka miliyoni 116 ikongeraho Coutinho na Dembele yatanzeho arenga miliyoni 200 z’amapawundi.

Neymar Jr arifuza gusubira mu ikipe ya FC Barcelona kuko aherutse kwandikira bamwe mu bakinnyi bayo bahoze bakinana ko badakwiriye guhangayika kuko ari hafi kongera gukinana nabo mu mwaka w’imikino utaha.

Neymar Jr utarahiriwe no gukina mu Bufaransa kubera ahanini imvune zikomeye yahagiriye,arifuza kugaruka muri FC Barcelona kugira ngo yongere gufatanya na Messi na Suarez gushaka ibitego.

Ntabwo bizohora Barcelona kubona uyu mukinnyi kuko PSG itari ku gitutu cyo kumugurisha gusa itegereje kubona amafaranga menshi kugira ngo imurekure cyane ko mu minsi ishize umuyobozi wayo yanenze imyitwarire ya Neymar Jr.

Mu minsi ishize nibwo Lionel Messi yasabye ubuyobozi bwa FC Barcelona ko bwakora ibishoboka byose bukagura uyu rutahizamu nabasha kuboneka.