skol
Kigali
startimes

RB Leipzig yatunguye Atletico Madrid iyisezerera muri UEFA Champions League

Imyidagaduro   Yanditswe na: Dusingizimana Remy 13 August 2020 Yasuwe: 3847

Ikipe ya RB Leipzig yafatwaga nk’insina ngufi muri UEFA Champions League,itunguye isi yose ubwo yasezereraga Atletico Madrid muri ¼ cy’irangiza,iyitsinze ibitego 2-1 mu mukino yanayoboye cyane.


Nubwo yari imaze amezi 2 idakina ndetse inatakaza rutahizamu wayo yagenderagaho,Timo Werner,ikipe ya RB Leipzig yakinishije neza abakinnyi yari isigaranye isezerera ikigugu Atletico Madrid cyaherukaga kugera ku mikino ya nyuma 2 y’iki gikombe mu myaka 6 ishize.

Atletico Madrid yaje muri uyu mukino idafite Thomas Partey usanzwe uri kizigenza mu kibuga hagati n’abandi bakinnyi bayo 2 basanganwe Coronavirus,yananiwe kuyobora uyu mukino yahabwagamo amahirwe menshi.

Umutoza Julian Nagelsmann yasabye abakinnyi be gusatira cyane Atletico Madrid baramvumvira ndetse igice cya mbere cyarangiye bari hejuru cyane mu kugumana umupira nubwo nta kipe yabashije kwinjiza igitego.

Uku kugumana umupira kwafashije Leipzig mu gice cya kabiri kuko yagarutse isatira cyane biyifasha kubona igitego ku munota wa 51 na Dani Olmo ku mupira mwiza yahawe na Daniel Sabitzer akawutera n’umutwe.

Atletico Madrid ikimara kwinjizwa iki gitego yahise ikanguka gusa urwego rw’abakinnyi bayo by’umwihariko abo hagati rwari hasi cyane.

Ku munota wa 58 nibwo Diego Simeone yinjije mu kibuga rutahizamu Joao Felix asimbura Hector Herrera.

Uyu musore ukiri muto yazamuye urwego rw’ubusatirizi rwa Atletico Madrid bituma ku munota wa 71 akorerwaho penaliti,yaje no gutera neza.Amakipe yombi yahise anganya 1-1.

Ikipe ya RB Leipzig yahise itangira gusatira Atletico Madrid cyane ko yari hejuru mu kwambura umupira no kuwugumana kurusha Atletico.

Ku munota wa 88 nibwo ibintu byabaye bibi cyane kuri Atletico Madrid ubwo Leipzig yakoraga contre attack hanyuma myugariro Angelino akata umupira mwiza inyuma gato y’urubuga rw’amahina,usanga Tyler Adams wari winjiye mu kibuga asimbuye ahagaze wenyine,atera ishoti rikomeye ryakoze ku kuguru kwa Stefan Savic,umupira ugana mu izamu,Oblak ntiyabasha kuwugarura.

Atletico Madrid yakinnye uyu mukino nk’ikipe idafite gahunda yahise igerageza gushaka igitego cyo kwishyura ariko amazi yari yamaze kurenga inkombe.

Mu minota 5 umusifuzi yongeyeho,umupira wakiniwe mu rubuga rw’amahina rwa Leipzig cyane ndetse Alvaro Morata abona uburyo bwiza imbere y’izamu ariko ntiyabubyaza umusaruro.

Leipzig yirwanyeho uko bishoboka kose birangira ikatishije itike ya ½ ndetse yiyongera kuri Bayern Munich na Borussia Dortmund nazo zo mu Budage zari zimaze kubaka izina muri iri rushanwa.

RB Leipzig niyo kipe ya mbere itarimo Cristiano Ronaldo ibashije gusezerera Diego Simeone muri UEFA Champions League.

Nyuma y’imyaka 11 RB Leipzig ishinzwe igeze muri ½ cya UEFA Champions League.Yashinzwe muri 2009 Itangirira mu cyiciro cya gatanu, 2011 ijya mu cya kane, 2013 yinjira mu cya Gatatu, 2014 ijya mu cya Kabiri, 2016 yinjira mu cyiciro cya mbere.

Leipzig izahura na PSG ya Kylian Mbappe na Neymar Jr yaraye isezereye Atlanta bigoranye ku bitego 2-1 muri 1/4 cy’irangiza.



Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Frank Lampard yavuze kuri Timo Werner wahushije igitego ari kumwe...

Umutoza wa Chelsea,Frank Lampard,yavuze ko nubwo umukinnyi we Timo Werner...
17 January 2021 Yasuwe: 3832 0

Abakinnyi b’Amavubi bahawe nimero bazambara muri #TOTALCHAN2020

Ikipe y’igihugu y’u Rwanda Amavubi ikomeje imyitozo I Douala muri Cameroun...
16 January 2021 Yasuwe: 5295 0

Bruno Fernandes yahishuye ikintu gikomeye Manchester United itazemerera...

Umukinnyi Bruno Fernandes wazamuye urwego rw’ikipe ya Manchester United kuva...
16 January 2021 Yasuwe: 4251 0

Arsenal na Mesut Ozil bumvikanye ku kintu gikomeye

Amakuru aturuka mu Bwongereza aravuga ko Arsenal yamaze kumvikana...
16 January 2021 Yasuwe: 5318 0

Mohamed Salah yahishuye umukinnyi wa Liverpool watumye arira kubera...

Rutahizamu Mohamed Salah ukinira Liverpool yatangaje ko kuva yagera muri...
16 January 2021 Yasuwe: 5111 0

Cristiano Ronaldo yaciye amarenga y’undi mwuga yashobora mu mashusho...

Rutahizamu Cristiano umaze imyaka isaga 15 ari hejuru mu mupira w’amaguru...
16 January 2021 Yasuwe: 4724 0