Ikipe ya Real Madrid yo muri Espagne ifite gahunda yo kwiyubaka bikomeye ubwo isoko rizaba rifunguye ariyo mpamvu yiyemeje kugurisha abakinnyi 6 bo mu ikipe ya mbere barimo Gareth Bale na James Rodriguez kugira ngo ikusanye miliyoni zirenga 100 z’amapawundi.

Sponsored Ad

Iyi kipe ikina La Liga irashaka kurekura aba bakinnyi bayo 6 mu rwego rwo gukusanya amafaranga yo kuzashora ku isoko rizafungura mu minsi iri imbere.

Abakinnyi bivugwa ko bazirukanwa barimo Lucas Vazquez, Mariano Diaz, Alvaro Odriozola,Nacho Fernandez,Gareth Bale na James Rodriguez.

Bale yari mu bakinnyi bagombaga kugurishwa mu mwaka ushize ariko ikipe ya Real Madrid yanze kumugurisha ku buntu mu Bushinwa ariyo mpamvu yayigumyemo ndetse biravugwa ko nta gihindutse ashobora kugaruka mu ikipe ya Tottenham yahozemo.

James nawe ntiyakunzwe n’umutoza wa Real Madrid,Zinedine Zidane ariyo mpamvu yagaragaye mu mikino 7 gusa muri uyu mwaka w’imikino wakomwe mu nkokora na Coronavirus.Amakuru aravuga ko ashobora kwerekeza mu ikipe ya Manchester United.

Aba bakinnyi bombi bahuriye ku kuba bifuzwa n’amakipe akomeye mu Bwongereza arimo Manchester United,Tottenham,Everton na Newcastle United.

Ntabwo bizwi neza igihe isoko rizafungurirwa kubera ibibazo byatejwe na Coronavirus,gusa biravugwa ko igiciro cy’abakinnyi kizamanuka cyane bitewe nuko ubukungu bw’isi yose bwasubiye inyuma kubera iki cyorezo kimaze guhitana abarenga ibihumbi 100 ndetse abacyanduye bakaba bararenze miliyoni 2.

Real Madrid irashaka gukusanya nibura miliyoni 105 muri aba bakinnyi bose kugira ngo ibone uko igura Kylian Mbappe wa PSG yifuje kuva kera.

Ikipe ya Real Madrid yakozweho na Coronavirus kuko kuwa 22 Werurwe 2020,Lorenzo Sanz wahoze ari Perezida wayo yapfuye nyuma yo kujyanwa mu bitaro ayirwaye.

Sanz wari ufite imyaka 76 y’amavuko, yayoboye Real kuva mu mwaka wa 1995 kugera mu wa 2000, muri icyo gihe Real yegukanye igikombe cya Champions League inshuro ebyiri.

Lorenzo Sanz Duran, umuhungu we, yanditse ku rubuga rwa Twitter ati: "Papa wanjye yapfuye".

Ntiyarakwiye kurangiza ubuzima bwe muri ubu buryo. [Ni] Umwe mu bantu beza cyane, b’umuhate mwinshi cyane kandi bakunda gukora cyane nigeze nabona mu buzima bwanjye. Umuryango we na Real Madrid ni bo yari yarihebeye".

Sanz ni we waguze abakinnyi nka Roberto Carlos, Clarence Seedorf na Davor Suker ubwo yayoboraga iyi kipe ya Real ifite ibikombe 33 bya shampiyona ya Espanye izwi nka La Liga.

Yatsinzwe amatora yo mwaka wa 2000 na Florentino Perez, ari na we uyoboye Real kugeza ubu.

Umuhungu wa Sanz, Fernando w’imyaka 46 y’amavuko, yakiniye Real Madrid kuva mu 1996 kugeza mu 1999, mbere yuko imyaka irindwi ye ya nyuma akina umupira w’amaguru ajya kuyisoreza muri Malaga.