Nyuma y’imyaka 14, Everton yatsinze Liverpool muri Merseyside Derby iyikura mu rugamba rwo gushaka igikombe rugeze mu mahina dore ko hasigaye imikino ine gusa.

Sponsored Ad

Muri uyu mukino wari ku rwego rwo hejuru,Everton yatsinze ibitego 2-0 Liverpool.

Nyuma ya Crystal Palace, Everton nayo yatumye Liverpool itsikira mu rugendo rwo gushaka igikombe cya shampiyona.

Nubwo Liverpool yayoboye cyane uyu mukino,ba rutahizamu bayo barimo Darwin Nunez na Mohamed Salah bahushije ibitego byinshi birangira batsinzwe uyu mukino.

Everton yafunguye amazamu ku munota wa 27 ku gitego cyatsinzwe na myugariro Branthwaite,nyuma y’akavuyo kavutse imbere y’izamu rya Liverpool,ubwugarizi ntibushobore gukuraho umupira.

Mbere y’aho,Everton yabonye penaliti ariko VAR ivuga ko Calvert Lewin wayikoreweho yari yaraririye.

Liverpool yarwanye no kwishyura iki gitego ariko amahirwe yabonye ntiyayikundira kubera umunyezamu Pickford wari hejuru cyane.Igice cya mbere cyarangiye ari igitego 1-0.

Mu gice cya kabiri ku munota wa 58, Calvert-Lewin yatsinze igitego cya kabiri n’umutwe,ku mupira wari uvuye muri koloneri ya Mcneil.

Everton yaherukaga gutsinda Liverpool tariki 17 Ukwakira 2010 ibitego 2-0 birimo n’icya Mikel Arteta ubu utoza Arsenal.

Urutonde rwa shampiyona

1. Arsenal 77pts
2. Liverpool 74pts
3. Man City 73pts (-2)