Mu mukino wo kwishyura wa ¼ cy’irangiza cy’igikombe cy’amahoro 2023-24,wahuzaga Gatsibo WFC na Fatima,wajemo imvururu maze Polisi yambika amapingu Kapiteni wa Fatima,Uwiragiye Chantal,watezaga imvururu.

Sponsored Ad

Nkuko amakuru dukesha B&B Kigali FM abitangaza,imvururu muri uwo mukino zatangiye ku munota wa 87,ubwo umunyezamu Usanase Djamilla wa Fatima yahabwaga ikarita ya 2 y’umuhondo,kubera gufata umupira yarenze urubuga rwe.

Fatima ntiyemeye iki cyemezo kubera imiterere y’ikibuga, ndete yari imaze gutsindwa ibitego 2-0,habura kimwe ngo bishyurwe 3-0 batsinze mu mukino ubanza.

Abakinnyi ba Fatima bahise buzura ku musifuzi,bashaka kumukubita,abashinzwe umutekano babyinjiramo ubwo.Hari amakuru ko umusifuzi wo hagati yakubiswe bidasanzwe.

Kubera umujinya Uwiragiye Chantal wari Kapiteni wa Fatima yasunitse umupolisi,aba yambitswe ipingu atyo.

Nyuma y’iminota nka 15’ imvururu zimaze guhoshwa,umukino warakomeje na Kapiteni Uwiragiye agaruka mu Kibuga gufasha ikipe ye.

Umukino warangiye ari ibitego 2-0 bya Gatsibo WFC, Fatima ikomeza muri ½ cy’irangiza ku bitego 3-2.

Mu yindi mikino ya ¼ ikipe ya Rayon Sports yasezereye APAER ku bitego 3-1,izahura na AS Kigali yasezereye Nasho ku bitego 12-0.

Fatima ikazahura n’Indahangarwa yasezereye Inyemera kuri penaliti esheshatu kuri eshanu nyuma y’aho buri kipe itsindiye mu rugo igitego 1-0.