Mukura VS yaguze umukinnyi w’umwaka I Burundi
Kuri uyu wa mbere taliki ya 07 Kanama nibwo ikipe ya mukura VS imaze gutangaza ko yasinyishije umukinnyi wahembwe nk’umukinnyi mwiza w’umwaka w’imikino ushize mu gihugu cy’Uburundi Gael Duhayindavyi imukuye mu ikipe ya Vital’o FC.
Uyu musore wavuzwe mu makipe akomeye mu Rwanda, cyane cyane Rayon Sports na Bugesera FC birangiye yerekeje muri Mukura VS aho asanze umutoza babanye umwaka ushize Haringingo Francis Christian nawe wamaze gusinyira iyi kipe,bivuze ko ariwe wagize uruhare runini kugira ngo uyu musore asinyire iyi kipe.
Kugura umusore nka Gael Duhayindavyi bisobanuye ko ikipe ya Mukura VS umwaka utaha ishaka kwitwara neza kurusha umwaka w’imikino washize cyane ko iyi kipe yari iri mu makipe ashobora kumanuka.
Duhayindavyi yabaye umukinnyi witwaye neza yaba muri shampiyona y’Uburundi ndetse no mu bikombe byose byakiniwe muri iki gihugu mu mwaka w’imikino warangiye.
Yakiniye amakipe atandukanye nka; Athlético Olympic FC, Lydia Ludic Burundi Académic FC, Flamengo FC na Vital’O FC.