Volleyball:RRA yegukanye igikombe cya shampiyona ku nshuro ya 7
Ikipe ya Rwanda Revenue Authority yegukanye igikombe shampiyona ya Volleyball mu bari n’abategarugori itsinze APR amaseti 3-0 (25-22, 25-18, 25-22) mu mukino wabereye mu nzu y’ imikino ya NPC kuri iki Cyumweru taliki ya 03 Nzeri 2017.
Uyu mukino wari utegerejwe n’abakunzi ba Volleyball wari ukomeye ku mpande zombi kuko buri kipe yari ifite amahirwe yo kwegukana iki gikombe cyane ko RRA VC yasabwaga kuwutsinda kugirango yegukane iki gikombe, mu gihe APR yaherukaga gutsindwa umukino wa mbere muri itatu iba iteganyijwe, yasabwaga gutsinda kugirango hazitabazwe umukino wa gatatu wa kamarampaka.
Iyi kipe iyobowe na Kapiteni Hakizimana Judith , Mukantambara seraphine ‘Baby’, Nzayisenga charlotte na Akimanizanye Ernestine, bahaye akazi gakomeye ikipe ya APR kuko mu maseti 3 yakinwe yarushwaga bikomeye.
Iki gikombe RRA WVBC yatwaye, kibaye icya karindwi yegukanye mu mateka yabo ndetse n’icya kane itwaye yikurikiranya cyane ko guhera mu mwaka wa 2014 nta yindi kipe iragikozaho imitwe y’intoki.