Umutoza wa Miroplast yatangaje ibanga rikomeye ryatumye yigaranzura ikipe ya Kiyovu Sports
Muhire Hassan yatangaje ko amashusho y’umukino wahuje Rayon Sports na Kiyovu sports ariyo yatumye abasha gutsinda ikipe ya Kiyovu Sports ibitego 2-1 ku munsi w’ejo taliki ya 22 Ukwakira 2017.
Ikipe ya Miroplast yazamutse mu cyiciro cya mbere uyu mwaka yabonye amanota yayo ya mbere ku munsi w’ejo nyuma yo gutsinda ikipe ya Kiyovu Sports ibitego 2-1, byatsinzwe na Irambona Fabrice ku munota wa 27 na Karera Hassan witsinze igitego ku munota wa 65 mu gihe igitego cy’impozamarira cya Kiyovu cyatsinzwe na Twagirimana Innocent ku munota wa 80.
Mu kiganiro yagiranye n’itangazamakuru nyuma y’uyu mukino Muhire Hassan yatangaje ko amashusho y’umukino uheruka guhuza Rayon Sports na Kiyovu Sports ariyo yatumye atsinda uyu mukino cyane ko yamaze iminsi 2 ayiga ndetse akabona uko iyi kipe yambara umweru n’icyatsi ikina.
Yagize ati “Video y’umukino wa Rayon Sports na Kiyovu Sports niyo yamfashije gutsinda uyu mukino kuko namaze iminsi 2 nyiga hanyuma mu nama nakoranye n’abakinnyi mu gutegura uyu mukino mara amasaha 3 nsobanurira abakinnyi banjye buri kimwe ku byerekeye imikinire ya Kiyovu Sports.”
Uyu mutoza yatangaje ko yakoresheje Projecteur mu gusobanurira abakinnyi be ibyerekeye Kiyovu Sports aho yavuze ko Kiyovu Sports ikina umupira wa kabiri ndetse igacungira ku mipira uwo bahanganye atakaje,bibafasha guhita bahereza imipira abakinnyi bakora ibitego barimo Fabrice Mugheni nabo bakayiha ba rutahizamu aho yemeza ko yabashije kwica ubwumvikane bw’abakinnyi bo hagati na ba rutahizamu.