Ibyo wamenya kuri Chelsea VS FC Barcelone zigiye guhura ku nshuro ya 13
Kuri uyu wa Kabiri nibwo amakipe 2 y’ibigugu Chelsea FC yo mu Bwongereza na FC Barcelona yo muri Espagne arahurira ku kibuga Stamford Bridge mu mukino w’ishyiraniro wa 1/8 cya UEFA Champions League.
Aya niyo makipe amaze guhurira inshuro nyinshi mu mikino ya Champions League kuko kuri uyu mugoroba ari iya 13 aho Chelsea ariyo imaze kuhacyana umucyo kurusha FC Barcelona.
Mu nshuro 12 ziheruka Chelsea yatsinze 4, Barcelona itsinda 3, banganya 5 aho inshuro yibukwa cyane ari iyo mu mwaka wa 2009 ubwo umusifuza w’umunya Norway Tom Henning Ovrebo yangaga penaliti 3 za Chelsea zagaragariraga buri wese bikarangira Chelsea isezerewe.
Chelsea yinjiye muri uyu mukino umwuka utangiye kuba mwiza nyuma yo gutsinda imikino 2 iheruka mu gihe FC Barcelona itaratsindwa na rimwe muri shampiyona La Liga.
Lionel Messi ntarabasha gutsinda Chelsea igitego mu mikino 8 amaze gukina nayo muri UEFA Champions League.
Barcelone yatsinze umukino umwe mu mikino itandatu iheruka gusuramo ikipe ya Chelsea ku kibuga Stamford Bridge, ndetse nta mukino n’umwe batinjijwe igitego.
Chelsea irashaka kugera muri ¼ ku nshuro ya mbere kuva mu 2013/14, ndetse ntiratsinda na rimwe mu mikino itandatu iheruka gukina muri iyi mikino yo gukuranamo.
Ibyo abatoza batangaje
Antonio Conte wa Chelsea:Tugiye gukina uyu mukino aritwe nsina ngufi.Tugomba kwitonda ariko tukagira ubushake bwinshi bwo gukina umupira.Tuzi ko Barcelona ikunda kugumana umupira no kuyobora umukino,ariko natwe tugomba kwitegura kubabara igihe tutawufite ndetse no kwirinda gukora amakosa.
Ernesto Valverde:Chelsea ifite uburyo bwo gukina yihariye,nk’andi makipe yo mu Bwongereza gusa tugomba kumenya ko tugiye gukina n’ikipe yatwaye igikombe cya shampiyona ubushize.Uraba ari umukino ukomeye kuko twese turifuza gukomeza.
Abakinnyi bashobora kubanza mu Kibuga:
Chelsea: Courtois; Azpilicueta, Christensen, Cahill; Moses, Kanté, Fàbregas, Alonso; Hazard, Pedro; Morata.
Barcelona: Ter Stegen; Sergi Roberto, Piqué, Umtiti, Jordi Alba; Busquets, Paulinho, Rakitić; Iniesta, Messi, Suárez.