Amarira ni bimwe mu byaranze Weasel mu ifatwa ry’ amashusho y’indirimbo ye nshya
Weasel Mayanja yafashe amashusho y’indirimbo yakoze yunamira mugenzi we Mowzey Radio uherutse kwitaba Imana.
Umuhanzi Weasel ubarizwa mu itsina rya Good Life yagaragaje agahinda kenshi mu ifatwa ry’amashusho y’indirimbo nshya yunamira Radio Mowzey mu ndirimbo yise ‘Tokyayitaba’, yariririmbwe mu rurimi rw’ Ikigande ikubiyemo amagambo yo guha icyubahiro no kunamira Mowzey Radio witabye Imana kuwa 1 Gashyantare 2018.
Iyi ndirimbo yise ‘Tokyayitaba’ yayifatiye amashusho akubiyemo ubutumwa yageneye nyakwigendera aho aririmba yicaye ku ntebe afite icyo kunywa mu icupa yegeranye n’indi ntebe nayo yayegereje icupa ndetse iriho ifoto ya Mowzey Radio . iyi ndirimbo yayikoze mu rwego rwo gushimangira ko nubwo “Radio yitabye Imana ijwi rye rizahora ririmba mu mitima y’abakunda Good Life.”
Mowzey Radio yashyinguwe ahitwa Nakawuka muri Kagga-Entebbe. Yabonye izuba kuwa 26 Mutarama 1985 yitaba Imana tariki ya 1 Gashyantare 2018. Akaba yarasize abana batanu barimo babiri yabyaranye na Mbabazi ufite inkomoko mu Rwanda .