Liverpool irakira Manchester City mu mukino w’agapingane k’abatoza
Kuri uyu wa Gatatu nibwo hakomeza imikino ibanza ya ¼ cya UEFA Champions League aho mu mukino wiswe uw’agapingane k’abatoza,ikipe ya Liverpool irakira Manchester City ku kibuga Anfield mu gihe FC Barcelona iraza kwakira AS Roma.
Uyu mwaka umutoza Jurgen Klopp wari Liverpool yeretse Pep Guardiola ko akimufiteho agahigo kuko niwe wenyine umaze kumutsinda mu mikino ya Premier League uyu mwaka ndetse ibitego 4-3 yamutsinze byari inshuri ya 5 amutsinze bituma aba umutoza wa mbere umaze gutsinda Guardiola inshuro nyinshi.
Guardiola ari mu bihe byiza uyu mwaka kuko asigaje umukino umwe ngo atware igikombe cya shampiyona aho asabwa gutsinda Manchester United mu mpera z’iki Cyumweru agahita acyegukana.
Aya makipe yombi Liverpool na Manchester City niyo amaze gutsinda ibitego byinshi muri Premier league ndetse ubusatirizi bwayo buri no mu bukomeye ku isi kubera ingano y’ibitego bamaze kwinjiza mu mikino itandukanye bakinnye.
Mohamed Salah aritezwe kuri uyu mukino
Pep Guuardiola yatangaje ko uyu munsi ba myugariro be bagomba kwitondera ubusatirizi bwa Mohamed Salah,Sadio Mane na Roberto Firmino bakomeje kwerekana ubudasa mu kunyeganyeza inshundura.
Aya makipe ni ubwa mbere agiye guhura mu mikino ya UEFA aho Manchester City imaze gutsindwa imikino 5 mu munani iheruka gukina na Liverpool.
Kevin De Bruyne kizigenza wa Manchester City
Imikino 2 yahuje aya makipe muri premier League,ikipe ya Manchester City yatsinze ibitego 5-0 mu gihe uwo kwishyura Liverpool yatsinze 4-3.
Klopp yavuze ko ikipe ya Liverpool ifite amateka akomeye ariko we n’abakinnyi be bagomba kubaka ayabo bagahura n’iyi kipe nziza mu Bwongereza yamaze kubona amahirwe yo gutwara igikombe cya shampiona uyu mwaka.
Uyu mukino urasirwa n’Umudage Felix Brych uratangira ku I saa 20:45 aho urabera rimwe n’urahuza FC Barcelona na AS Roma wo urabera Camp Nou.
Abakinnyi bashobora kubanza mu kibuga
Liverpool: Karius; Alexander-Arnold, Lovren, Van Dijk, Robertson; Milner, Henderson, Oxlade-Chamberlain; Salah, Firmino, Mané.
Abadahari: Matip,Gomez, Lallana, Klavan, Woodburn, Brewster,Can
Manchester City: Ederson; Walker, Otamendi, Kompany, Laporte; De Bruyne, Fernandinho, D Silva; Sterling, Jesus, Sané.
Abadahari: Mendy na Agüero
Barcelona: Ter Stegen; Roberto, Piqué, Umtiti, Alba; Paulinho, Busquets, Rakitić, Iniesta; Suárez, Messi
Roma: Alisson; Florenzi, Fazio, Manolas, Kolarov; Nainggolan, De Rossi, Strootman; El Shaarawy, Džeko, Perotti
Abadahari: Karsdorp, Ünder