Indi ndege yo mu bwoko bwa Boeing 737 Max 8 yari ikoze impanuka Imana ikinga ukuboko
Ubwo iyi ndege yarimo ubusa,yari ihagurutse ku kibuga cya Orlando muri Florida,US,yerekeza Victorville muri California aho Southwest Airlines iparika indege zayo,yagize ikibazo cya moteri abapilote bayo bayigarura ku kibuga igitaraganya itarakora impanuka.
Nyuma y’aho indege ya Boeing 737 Max 8 ya kompanyi ya Ethiopian Airlines ikoreye impanuka kuwa 10 Werurwe 2019, imaze iminota 6 ihagurutse,igahitana abantu 157,indi yo muri ubu bwoko yari igiye gukora impanuka ariko abapilote bayo bayisubiza hasi igitaraganya.
Nyuma y’iminota mike ihagurutse, abapilote b’iyi ndege bumvise itangiye kugira ibibazo muri moteri bayisubiza hasi kugira ngo itabahitana.
Ibihugu byinshi birimo n’u Rwanda byahagaritse ubu bwoko bw’izi ndege mu kirere cyabyo kubera ko zimaze guhitana abantu benshi nta mezi menshi ashize.
Iyi mpanuka yari igiye kuba kuri uyu wa Kabiri taliki ya 26 Werurwe 2019, ubwo abapilote bari bayimuriye ahandi itarimo abagenzi nkuko iki kigo cya Southwest Airlines cyabitangaje .
Kompanyi ya Southwest Airlines ifite indege 34 za Boeing 737 Max 8 zakumiriwe na US,bityo irimo kugerageza kuzikura aho zakoreraga izimurira muri California aho iparika indege zayo zose.
Umwaka ushize nabwo indege ya Boeing 737 Max 8 ya kompanyi ya Lion Air yakoze impanuka igwa mu nyanja, ihitana abantu 189 bari bayirimo, nyuma y’iminota 13 ihagurutse .