SUDANI:Inama ya gisirikare yaburijemo igikorwa cyo kugerageza guhirika ubutegetsi
Umuvugizi wayo Jenerali Jamal Omar ejo ku wa kane nijoro yatangaje kuri televiziyo y’igihugu ko abantu barenga icumi batawe muri yombi.
Avuga ko aba barimo abakiri ku kazi muri iki gihe n’abari mu kihuruko cy’izabukuru bo mu gisirikare no mu rwego rw’igihugu rw’iperereza.
Jenerali Omar yagize ati: "Twabonye ibiteye akaga, byari bimaze igihe biteye impungenge mu mutekano w’iki gihugu, bitewe n’itsinda ry’abantu badashaka ibyo rubanda yifuza".
Yongeyeho ko iryo gerageza ryo guhirika ubutegetsi ryari rigamije kuburizamo amasezerano y’isaranganya ry’ubutegetsi ari kunonosorwa hagati y’inama ya gisirikare n’abigaragambya.
Ntibizwi neza igihe ayo masezerano azashyirirwaho umukono.
Iri ribaye igerageza rya gatatu ryo guhirika ubutegetsi inama ya gisirikare muri Sudani itangaje ko yaburijemo, nkuko Ahmed Kodouda, umusesenguzi kuri Sudani, yabibwiye ikiganiro Newsday cya BBC dukesha iyi nkuru.
Yongeyeho ati: "Abantu benshi ntibari gushira amakenga ibyatangajwe [n’inama ya gisirikare], ariko mu by’ukuri hari abantu bashishikariye guhungabanya iyi nzibacyuho".