I Goma hagaragaye umupasiteri urwaye icyorezo cya Ebola
Minisiteri y’ubuzima yamenyesheje ko hari umupasiteri wasuzumwe bagasanga afite iyi ndwara ubwo yari ageze i Goma ejo ku cyumweru taliki ya 14 Nyakanga 2019, aje n’imodoka itwara abagenzi.
Iyi minisiteri ariko ivuga ko ibyago ko iyi ndwara iza gukwirakwira muri uyu mujyi biri ku kigero cyo hasi.
Abantu barenga 1,600 bamaze kwicwa na Ebola kuva yakwaduka mu burasirazuba bwa Kongo mu mwaka ushize.
Uyu mupasiteri yageze i Goma avuye kuri kilometero 200 i Butembo, aha hakaba hari abantu bafashwe n’iyi ndwara.
Itangazo rya minisiteri y’ubuzima ya Kongo rigira riti: "Kubera uburyo uyu murwayi yabonetse akanashyirwa mu kato vuba, ibyago ko iyi ndwara ikwirakwira mu mujyi wa Goma biri hasi".
Biravugwa ko umushoferi n’abagenzi 18 yari atwaye baza gukingirwa kuri uyu wa mbere.
Umujyi wa Goma umaze igihe witeguye guhangana n’iyi ndwara.
Umujyi wa Gisenyi mu Rwanda bisa n’ibifatanye, nawo hashize igihe witegura guhangana na Ebola mu gihe yahagera.
Ebola yandura iyo umuntu akoranyeho n’inyamaswa cyangwa umuntu uyirwaye, cyangwa akoze ku murambo w’uwo yishe.
Yandura vuba kuko amatembabuzi yose kandi macye y’uyirwaye ashobora kwanduza utayirwaye uyakozeho.
Inkuru ya BBC