Gasogi United igiye kugura rutahizamu wigeze guhesha Rayon Sports igikombe cya shampiyona
Nkuko amakuru agera ku Umuryango abitangaza,uyu rutahizamu ukomoka muri Mali ategerejwe i Kigali mu ijoro ryo kuri iki Cyumweru,kugira ngo asinyire Gasogi United amasezerano.
Gasogi United yasinyishije abakinnyi benshi muri iyi mpeshyi,ikomeje kwitegura uko yazitwara neza mu cyiciro cya mbere igiye gukina bwa mbere muri uyu mwaka w’imikino wa 2019/20.
Tidiane Kone yageze mu ikipe ya Rayon Sports muri Mutarama 2017 aje gufatanya na rutahizamu Moussa Camara mu busatirizi,birangira we na bagenzi be bafashije iyi kipe gutwara shampiyona ya 2016/2017.
Tidiane Kone nasinyira Gasogi United, araba abaye umunyamahanga wa kane isinyishije,nyuma ya Manase Mutatu Mbedi ukomoka muri Repubulika Iharanira Demokarasi ya Congo, Umunya-Cameroun Athassi Fabrice Merlin n’umunya-Liberia Herron Scarla Berrian wahoze muri Kiyovu Sports.
