Nyarugenge: Umumotari yagwiriwe n’igiti yari yugamye munsi ahita apfa
Ahagana saa tatu z’igitondo (9h00 a.m) nibwo uyu musore yagwiriwe n’igiti yari yugamyeho cyari giherereye mu Mudugudu w’Ishema, mu Kagari ka Kiyovu, mu Murenge wa Nyarugenge, Akarere ka Nyarugenge.
Uyu mumotari wari wugamye munsi y’igiti giteye ku muhanda hafi ya Hotel Galaxy,yatwaraga moto RD 484Z.
Ishami rya Polisi rishinzwe kurwanya inkongi (Fire Brigade) ryatabaye ribasha gukura umurambo w’uriya musore munsi y’igiti, moto ye n’ibyo yari afite byatwawe n’Ishami rya Polisi rishinzwe umutekano wo mu muhanda.
Umuvugizi wa Polisi mu Mujyi wa Kigali, CIP Umutesi Marie Goretti, yabwiye Umuseke dukesha iyi nkuru ko Abanyarwanda bakwiye kwitwarararika mu gihe k’imvura bakirinda kugama munsi y’igiti.
Ati “Mbere na mbere mbanje kwihanganisha umuryango w’uwapfuye. Nkaba nasaba abaturage kutugama munsi y’ibiti kuko hari impanvu eshatu zitari nziza; kuba igiti cyakugwira, kuba cyakubitwa n’inkuba no kuba ukomeza kunyagirwa, nta mutekano uba ufite igihe wugamye munsi y’igiti.”