Libya: Inyeshamba za Jenerali Haftar zigaruriye umujyi ukomeye wa Sirte
Uyu mujyi wari mu maboko y’igisirikare cya Leta y’ubumwe ya Libya ishigikiwe na ONU, kuva umutwe wa ISIS uhirukanwe mu mwaka wa 2016.
Inyeshamba ziyoborwa na Jenerali Khalifa Haftar zimaze igihe ziri mu ntambara mu zifite gahunda yo kwigarurira umurwa mukuru wa Tripoli.
Leta ya Libya ntacyo iratangaza kuri aya makuru y’ifatwa ry’uyu mujyi.
Umunya Libya usanzwe aba mu mujyi wa Sirte uri ku nkombe z’inyanja ya Méditerranée, yabwiye Reuters ko babonye imirongo myinshi y’ingabo ziyita iz’igihugu cya Libya (LNA) ziyobowe na Jenerali Haftar.
Ati: "Muri uyu mwanya bigaruriye ibice binini by’umujyi. Hari n’amasasu akomeje kumvikana".
Aya makuru atangajwe nyuma y’aho umukuru w’igihugu cya Turkiya, Recep Tayyip Erdogan, atangarije ko ingabo z’iki gihugu zatangiye kwinjira muri Libya gufasha leta ya Tripoli.
Leta ya Libya isanzwe ishyigikiwe na ONU ifashwa n’ibihugu nka Turkiya na Qatar, mu gihe Jenerali Haftar nawe ashigikiye na Misiri hamwe na Leta zunze Ubumwe z’Abarabu (Emirats Arabes Unis).
Inyeshamba za Jen. Haftar zavuze ko umujyi wa Sirte wafashwe nyuma y’ibitero by’indege byabaharuriye inzira.
Ahmad al-Mesmari uvugira inyeshamba za Jen. Haftar yavugiye kuri televiziyo ati: "Sirte yabohojwe…yavanwe mu maboko y’imitwe y’iterabwoba".
Inkuru ya BBC