Perezida Kagame yafunguye ikigo cy’ubuvuzi bwa Kanseri bwisumbuyeho
Umwihariko w’iki kigo ni ukuvura cancer mu buryo bwo gushiririza uturemangingo twayo hifashishijwe imirasire, buzwi nka "radiation therapy" (bwitwa kandi radiotherapy).
Nibwo bwa mbere ubu buvuzi bugiye gutangira gukoreshwa mu Rwanda.
Perezida Paul Kagame niwe wafunguye iki kigo, byakozwe kandi kuri uyu munsi mpuzamahanga wahariwe kuzirikana indwara ya cancer.
Imashini ebyiri zikora ubu buvuzi ziri muri iki kigo zifite ubushobozi bwo kuvura abantu hagati ya 80 na 150 ku munsi nk’uko minisiteri y’ubuzima ibivuga.
Ishami ry’umuryango w’abibumbye ryita ku buzima ku isi, rivuga ko Cancer iza ku mwanya wa kabiri mu ndwara zica benshi ku isi, mu 2018, cancer yishe abantu miliyoni 9,8.
Minisiteri y’ubuzima mu Rwanda ivuga ko iyi ari inkuru nziza ku bantu bajyaga mu mahanga gushaka serivisi za radiotherapy, ubuvuzi bwashoborwaga na 10% by’ababukeneye mu Rwanda.
Iki kigo kizajya cyakira abarwayi bakoresha n’uburyo bw’ubwisungane mu kwivuza buzwi nka ’Mutuelle de sante’ busanzwe bukoreshwa n’abaturage benshi mu Rwanda badafite ubwisingizi bwite.
Ibitaro bivura indwara za cancer bisanzweho bya Butaro mu majyarurgu, n’ibindi bicye mu Rwanda, ku barwayi ba cancer byabashaga gutanga ubuzi bukoresheje imiti buzwi nka ’chemotherapy’.
Mu gufungura iki kigo, minisitiri w’ubuzima Dr Diane Gashumba yavuze ko ubu buryo bushya buje kunganira ubu busanzweho.
OMS ivuga ko hafi 70% y’abicwa na cancer ari abo mu bihugu bikennye n’ibifite ubukungu buciriritse.
Inkuru ya BBC