Coronavirus yageze mu ikipe ya Real Madrid bituma La Liga ihagarika imikino
Isi yose iri mu bwoba bw’icyorezo cya COVID-19 giterwa na coronavirus kiri kugenda gikwirakwira uko bwije n’uko bukeye aho kuri ubu cyamaze gufatwa nk’igihangayikishije isi muri rusange.
Real Madrid ifite amakipe y’imikino itandukanye yamaze gutangaza ko yahisemo guha akato abakinnyi bayo bose kugeza ku bakina umupira w’amaguru bazwi cyane.
Real Madrid yasohoye itangazo rigira riti “Real Madrid CF iratangaza ko umwe mu bakinnyi bayo bo mu ikipe ya mbere ya Basketball yasanganywe icyorezo cya COVID-19 coronavirus.
Umwanzuro wafashwe nuwo guha akato abakinnyi bo mu makipe 2 arimo ikipe nkuru ya Basketball n’iy’umupira w’amaguru.kuko yitoreza hamwe mu kigo cya Ciudad Real Madrid.
Byemejwe ko hafungwa ibibuga bya siporo kandi n’abakozi batanga serivisi za Real Madrid bashyirwa mu kato.
Imikino yari iteganyijwe uyu munsi no ku munsi w’ejo muri Euroleague basketball na La Liga mu mupira w’amaguru ntabwo izakinwa.
Real Madrid ya ruhago yari imaze iminsi yitegura umukino wa Eibar muri La Liga wagombaga gukinwa kuri uyu wa Gatanu.
Aya makuru akimara kumenyekana,abakinnyi ba Real Madrid FC bari bagiye gukora imyitozo saa tanu ku kibuga cy’imyitozo cya Valdebebas bahise birukanwa igitaraganya bajyanwa mu kato.
Icyorezo cya Covid-19 kimaze guhitana abarenga ibihumbi 4 ndetse abagera ku bihumbi 150 bamaze kucyandura.Muri Afurika kimaze kugera mu bihugu 12 byose.
Abategura shampiyona ya La Liga bemeje ko bagiye kuba bayihagaritse imikino 2 ikurikira kugira ngo barebe niba hari abakinnyi bo mu makipe batanduye iki cyorezo.