Umuryango wose watorotse nyuma yo kuwusangana icyorezo cya Coronavirus
Uyu muryango bivugwa ko wari wanze gushyirwa mu kato nyuma yo kwemezwa ko wanduye coronavirus, waje gushakishwa maze uza gufatwa na polisi nyuma y’uko ishami ry’ubuzima ryegereye inkiko kugira ngo risabe ko uwo muryango wafatwa ugasubizwa mu bitaro.
Umuvugizi w’ishami ry’ubuzima ryo muri ako gace ka Gauteng, Kwara Kekana, yavuze ko iryo shami ryegereye urukiko mu ijoro ryo ku wa Mbere tariki 16 Werurwe kugira ngo bemererwe kandi bategeke ku ifatwa ry’uwo muryango watorotse uvuga ko wahatiwe gushyirwa mu kato.
Kwara Kekana ati: “Ishami ryegereye urukiko mu ijoro ryo ku wa mbere risaba icyemezo cyihutirwa kugira ngo tutabangamira uburenganzira bw’itegeko nshinga bw’abarwayi nta cyemezo cy’urukiko. Icyemezo cy’urukiko cyatanzwe mu ma saa saba z’ijoro bishyira mu gitondo kugira ngo iri shami rishyigikirwe.”
Uru rwego rukimara kubona icyemezo rwahise rumenyesha abapolisi kugirango bayangire gukurikirana uyu muryango. Ku wa kabiri nyuma ya saa sita nibwo abapolisi babashije kubona uyu muryango.
Kekana yagize ati: “Twishimiye ko uyu muryango wabonetse ahagana mu ma saa 12h30 kuri iki gicamunsi, ubu ukaba wasubiye ku kigo nderabuzima cyagenwe kwakira abarwayi ba Coronavirus.”
Inzego z’ubuzima zikaba zihamagarira Abanya Afurika y’Epfo gufatanya n’abashinzwe ubuzima mu gihe iki gihugu gihanganye n’ikibazo cya coronavirus, aho abantu barenga 60 bapimwe bakabasangana ubwandu bushya bwa Covid-19, gusa kugeza magingo aya iki cyorezo kikaba ntawe kirahitana muri iki gihugu.
Abantu bagera ku 206,942 ku Isi bamaze kwandura coronavirus, hakaba hamaze gupfa abantu abarenga 8,272 ku Isi mu gihe abagera 82,889 bamaze gukira iyi virusi.