Print

Botswana: Abadepite banze kwishyira mu kato bagashyirwamo ku ngufu

Yanditwe na: Dusingizimana Remy 10 April 2020 Yasuwe: 1042

Ejo ku wa kane, abadepite bose muri Botswana hamwe n’umukuru w’igihugu, Mokgweetsi Masisi, bategetswe kuguma imuhira bonyine mu gihe cy’iminsi 14.

Byabaye nyuma y’aho umuganga wari amaze igihe abapima asuzumwe agasanga yaranduye coronavirus.

Ariko, itangazo ryasohowe na leta rivuga ko hari abadepite bamwe babonywe bibereye mu maduka bariko barahaha.

Aba badepite bahise bakurwa mu ngo zabo ku ngufu bajyanwa mu kigo cya leta gisanzwe gicungwa cyane n’inzego z’umutekano.

Iryo tangazo ntirivuga umubare w’abadepite barenze kuri ayo mategeko.
Botswana yatangaje bwa mbere ko yabonetsemo abantu 2 ba mbere banduye coronavirus ku wa 31 z’ukwezi kwa gatatu.

Hashize amasaha makeya gusa, icyo gihugu cyahise gitangaza ko hari umuntu wa mbere wahitanwe n’icyo cyorezo, ariko bamenye ko ari yo yamuhitanye yamaze gupfa.

Kuva icyo gihe kugeza ubu, hamaze kuboneka abantu 13 banduye coronavirus muri Botswana.

Abadepite bose 57 ba Botswana bagombaga kujya mu kato mu gihe cy’iminsi 14 nyuma y’uko umwe mu baganga b’Inteko ishinga amategeko bamusanzemo Covid-19.

Ibi byategetswe n’ushinzwe serivisi z’ubuzima mu gihugu Bwana Malaki Tshipayagae nk’uko byatangajwe na guverinoma ya Botswana.