Zimbabwe:Umudepite na bagenzi be bari baraburiwe irengero basanzwe ku muhanda bakubiswe bikomeye
Umudepite wo mu ishyaka ritavuga rumwe n’ubutegetsi muri Zimbabwe wari washimuswe we na bagenzi babiri nyuma y’imyigaragambyo i Harare, babasanze bajugunywe ku nzira bakubiswe bikomeye nk’uko iri shyaka ribivuga.
Ishyaka Movement for Democratic Change (MDC) ryari ryatangaje ejo kuwa kane ko umwe mu barihagarariye mu nteko Joanna Mamombe n’abakuriye urubyiruko Cecilia Chimbiri na Netsai Marov bafashwe kuwa gatatu bari mu myigaragambyo.
Iyi myigaragambyo yari iy’abamagana uburyo hari abantu bari kwicwa n’inzara kubera ingamba zo guhagarika ubuzima busanzwe mu bice bimwe.
Ishyaka MDC uyu munsi ryatangaje ko aba bagore batatu babonetse bakubiswe cyane bajugunywe ku nzira bakaba bahise bajyanwa kwa muganga. Rivuga ko polisi yageze aho babasanze.
Bashakishijwe kuri ’stations’ za polisi zitandukanye barababura kuko bakekaga ko bafunzwe nk’uko umunyamakuru wa BBC muri Zimbabwe abivuga.
Umuryango wa Amnesty International wari watangaje ko leta ariyo ikwiye kubazwa ishimutwa ry’aba bantu bo mu ishyaka ritavuga rumwe n’ubutegetsi.
Zimbabwe yafashe ingamba zo guhagarika ubuzima busanzwe mu bice bimwe na bimwe mu rwego rwo kwirinda ikwirakwira rya coronavirus, izi ngamba zizarangira ku cyumweuru.
